A Xunta reforza ás empresas que tramitan licenzas urbanísticas cun novo decreto
O Goberno galego quere "simplificar os trámites urbanísticos" na construción de vivendas.
Por Europa Press / Redacción | SANTIAGO DE COMPOSTELA | 02/06/2025 | Actualizada ás 15:22
O presidente da Xunta, Alfonso Rueda, anunciou a intención do Executivo que dirixe de cambiar a forma de tramitar as licenzas municipais para a construción de vivenda co fin de que os tempos de espera poidan baixar de tres meses a un mes.
En concreto, o Goberno galego dirixirase ao Consello Consultivo de Galicia para que analice, con carácter previo á súa aprobación, un decreto encamiñado a permitir que as entidades de certificación de conformidade municipal (Eccom) --compañías que xa xogan un papel análogo ao dunha xestoría na validación de licenzas-- poidan "simplificar trámites urbanísticos" para construír vivenda.
Segundo trasladou durante a comparecencia posterior ao Consello da Xunta, o Executivo autonómico analizou a medida coa Federación Galega de Municipios e Provincias (Fegamp) e con outros axentes implicados. O obxectivo é que estea "dispoñible" nas próximas semanas.
Nesta liña, explicou que o obxectivo é "axilizar prazos, medir a coordinación entre as administracións, reducir os tempos e incertezas e complementar o traballo dos consellos". Todo iso "sen perder ningunha garantía xurídica e observando todos os requisitos legais". Tal e como ampliou a conselleira de Vivenda e Planificación de Infraestruturas, María Martínez Allegue, atribuirase aos certificados emitidos polas Eccom, e que acompañen unha solicitude de licenza, a mesma validez que aos informes técnicos e xurídicos municipais.
UM MES DE PRAZO
Así, unha vez presentada a solicitude de licenza, o concello disporá do prazo dun mes para resolver a concesión ou non concesión dese título habilitante. Pola súa banda, engadiu a conselleira, o órgano municipal competente outorgará licenza asumindo ese certificado de conformidade que acreditará expresamente a conformidade coa legalidade urbanística e o plan municipal correspondente.
No entanto, destacou a titular de Vivenda, para "garantir a autonomía local", os concellos que rexeiten esta vía poderán excluír a intervención da Eccom mediante ordenanza municipal. O Goberno galego lembra que sistemas similares xa están en funcionamento en grandes cidades como Madrid, Barcelona ou Valencia. Agora, Galicia reforza esta vía cunha normativa propia que define en detalle as funcións, principios de actuación e requisitos das Eccom.
"Axilizamos, simplificamos e reducimos prazos, garantindo sempre a seguridade xurídica, tanto para os particulares como para os concellos", concluíu a conselleira, quen enmarcou esta iniciativa como "un paso máis" cara ao obxectivo de garantir a toda a cidadanía galega "unha vivenda de calidade e a prezos alcanzables".
