Formoso chama á responsabilidade política en Touro tras ter perdido por falta de consenso máis de 750.000 euros en axudas
Formoso alertou da "grave situación" no municipio por ser o único dos 93 da provincia que non aprobou en tempo e forma o Plan Único (POS+2025), "debido á falta de acordo entre os grupos municipais para decidir o destino dos fondos".
Por Europa Press / Redacción | SANTIAGO DE COMPOSTELA | 02/06/2025 | Actualizada ás 18:59
O presidente da Deputación da Coruña, Valentín González Formoso, visitou este luns o municipio de Touro, onde foi recibido polo alcalde, Roberto Castro, e integrantes do goberno municipal. Durante o encontro, celebrado no salón de plenos do consistorio, Formoso alertou da "grave situación" no municipio por ser o único dos 93 da provincia que non aprobou en tempo e forma o Plan Único (POS+2025), "debido á falta de acordo entre os grupos municipais para decidir o destino dos fondos".
As bases do Plan Único establecen que os investimentos aos que se destinarán os fondos deben ser aprobados polo pleno municipal. A falta deste acordo plenario no prazo estipulado "imposibilita a transferencia dos fondos, o que supón un prexuízo directo para os veciños e veciñas", sinala a institución provincial. Esta circunstancia, engade, "fai que Touro perda este ano 753.250 euros da primeira achega do POS+2025, aprobada no pleno da Deputación do pasado venres para os restantes 92 municipios da provincia". A esta achega, engade, poden sumarse agora os 269.190 euros do plan adicional.
