Publicadas as listas temporais do Sergas para auxiliar administrativo, servizos centrais, cociñeiro e pinche

O Diario Oficial de Galicia (DOG) publica este martes as listas de selección temporal das categorías de auxiliar administrativo, persoal de servizos xerais (PSX), cociñeiro e pique. O número de aspirantes admitidos por categorías foi de 24.277, en concreto: 12.221 no grupo auxiliar da función administrativa, 7.483 en persoal de servizos xerais, 3.999 en pinche e 574 en cociñeiro.

Diso informou a Consellería de Sanidade nun comunicado, no que precisa que as novas inscricións en relación ao pasado ciclo son: 1.063 en grupo auxiliar da función administrativa, 859 en persoal de servizos xerais, 214 en pinche e 79 en cociñeiro.

As listas atópanse publicadas, a disposición das persoas interesadas, na páxina web do Servizo Galego de Saúde (Sergas), no apartado Emprego Público-Listados de persoal estatutario. Ademais, o estado de cada solicitude pode ser consultado por cada aspirante no seu expediente electrónico persoal en Fides/expedient-e/sección de procesos.

As persoas interesadas poderán presentar reclamación ante as xerencias das áreas sanitarias e as direccións con competencias na xestión de persoal das entidades adscritas á Consellería de Sanidade no prazo de dez días hábiles, ata o 17 de xuño.

Ademais, o departamento autonómico informou de que este mércores, día 4 de xuño, publicaranse as listas provisionais das seguintes categorías: celador, celador quenda discapacidade intelectual, técnico en farmacia, técnico superior en hixiene bucodental, técnico superior en imaxe para o diagnóstico e técnico superior en radioterapia.

Oposicións á Xunta no recinto de Amio, en Santiago de Compostela | Fonte: XUNTA - Arquivo