O eurodeputado galego Nicolás Casares celebra que Europa descarte estender o sistema de comercio de emisións á pesca

O eurodeputado socialista galego, Nicolás González Casares, puxo en valor que a Comisión Europea descartase na aprobación do Pacto Europeo dos Océanos a proposta de estender o sistema de comercio de emisións ao sector pesqueiro incluída nunha filtración previa. "Hai apenas un mes, lanzamos a voz de alarma contra unha medida absolutamente lesiva, inxusta e ineficaz que cuestionaría a viabilidade do sector pesqueiro. Grazas á presión exercida, hoxe a Comisión rectifica un camiño totalmente errado, esperemos que sen volta atrás", sinalou nun comunicado remitido aos medios.

Tras a presentación este xoves da comunicación sobre o Pacto Europeo dos Océanos, o eurodeputado galego volveu a incidir en que o sector pesqueiro europeo ten unha pegada de carbono moi baixa --entre o 0,1 e o 0,2 % das emisións de CO2 da Unión Europea-- e carece de alternativas de descarbonización, polo que a extensión do sistema ETS "non ten ningún sentido".

Igualmente, González Casares chamou a atención sobre unha das propostas incluídas no pacto, a prohibición das artes de contacto de fondo nas áreas mariñas protexidas e esixiu un enfoque equilibrado ao respecto. "No Parlamento xa nos pronunciamos en contra das prohibicións xerais, que non teñen sentido. Unha medida deste calado debe realizarse caso por caso, baseándose na mellor información científica e contando cos afectados, habilitando as compensacións necesarias no seu caso. Estaremos vixiantes", advertiu.

Con todo, o eurodeputado galego saudou o anuncio contido no Pacto polo cal a Comisión se compromete a presentar unha Lei Oceánica en 2027, algo que o Grupo dos Socialistas europeos reclama desde hai tempo. "Esperamos que a Lei non quede nunha mera revisión da directiva de planificación do espazo mariño senón que sirva para dar coherencia ás políticas que afectan ao ámbito marítimo", indicou. "Hai boas intencións no Pacto, pero falta concreción, especialmente orzamentaria, ese será o test de realidade de face á negociación do futuro marco financeiro plurianual", apuntou.

CUME DOS OCÉANOS

O eurodeputado socialista explicou que a presentación do Pacto Europeo dos Océanos faise días antes de que Niza acolla a partir do día 8 a Conferencia das Nacións Unidas sobre o Océano, conferencia na que el mesmo participará dentro da delegación do Parlamento Europeo. No marco desa conferencia, González Casares manterá encontros co comisario de Pesca, Costas Kadis, dirixentes da FAO, da International Seabed Autthority, da Conferencia das Nacións Unidas sobre Comercio e Desenvolvemento (UNCTAD), a Organización Marítima Internacional, así como representantes do sector pesqueiro, entre outros.

CEPESCA CELEBRA QUE SE RECOÑEZA AO SECTOR COMO "ESENCIAL"

Pola súa banda, a Confederación Española de Pesca (Cepesca) puxo en valor que a publicación do Pacto Europeo do Océano recoñeza a pesca como "sector esencial para a soberanía alimentaria europea", aínda que lembrou que debe ir acompañado de "medios suficientes e dunha aplicación práctica, adaptada á realidade de cada rexión".

Nun comunicado, o sector pesqueiro español, que se suma así á valoración de Europêche e a Alianza Europea da Pesca de Fondo (EBFA), considerou que se trata de "unha iniciativa estratéxica que marca o rumbo cara a un futuro marítimo resiliente e sustentable para a Unión Europea". Ademais, a asociación subliñou a importancia de que o Pacto Europeo do Océano recoñeza a pesca "como sector económico esencial no marco xeral da gobernación mariña".

"Para a frota española, como para toda a europea, isto representa un gran avance para mellorar a competitividade do sector, aumentar a produción sustentable de produtos pesqueiros e impulsar a innovación tecnolóxica, á vez que se protexen os océanos sans e apóiase o desenvolvemento das comunidades costeiras", engadiu.

O secretario xeral de Cepesca e presidente de Europêche, Javier Garat, manifestou que este pacto ofrece "unha oportunidade para aliñar a política pesqueira cun modelo moderno e integrado de gobernación oceánica". "Valoramos especialmente a 'Visión 2040' para a pesca e a acuicultura, e o plan para atraer novas xeracións ao sector", destacou.