Cruzamento de acusacións entre PP e PSOE sobre o cambio de dirección na residencia de Trabada

O Grupo Provincial do Partido Popular acusou ao goberno bipartito da Deputación de Lugo de cesar á directora da residencia de maiores de Trabada, "o que confirma a existencia de problemas no centro", algo que desmente a Presidencia do Goberno provincial, asegurando que "é rotundamente falso", xa que "foi ela a que presentou a súa renuncia de maneira voluntaria, tal e como consta por escrito". Segundo explicou o deputado socialista Pablo Rivera, na súa carta de renuncia, a directora expón que a súa decisión responde a "a campaña pública de desprestixio da que foi obxecto, con acusacións infundadas que cuestionaban a súa profesionalidade".

Para os socialistas "esta realidade abre interrogantes sobre quen impulsou esa campaña e con que finalidade" e, ademais de amosar o seu "respecto pola decisión, que foi adoptada nun contexto de forte presión externa", afirman que a dirección da residencia estivo e segue estando "plenamente garantida, asegurando en todo momento o correcto funcionamento do centro e a atención ás persoas usuarias". Mentres, o PP asegurou que constan "polo menos" dez queixas oficiais inscritas no libro de reclamacións da residencia no último ano. O portavoz popular, Antonio Ameijide, lembrou que "os responsables da residencia son o Concello e a Deputación" e "os responsables dos gobernos local e provincial deberían ser capaces de escoitar e atender as reclamacións".

Pola súa banda, Rivera sinalou aos populares como responsables desta situación e preguntouse "se non son tamén corresponsables do clima que levou a esta decisión de cesamento". Ademais, engadiu que "a utilización partidista dun asunto tan sensible como o coidado das persoas maiores non debería ter cabida na política institucional". Ademais de reclamar ao PP que tamén esixa explicacións semellantes á Xunta de Galicia, "que é quen ostenta as competencias en materia de políticas sociais", pediu unha aclaración sobre "o seu papel na difusión destas acusacións" e que valore "se é compatible cunha actuación institucional responsable". Ante isto, Antonio Ameijide asegurou que "non buscan ningún tipo de rédito político, o único que queren é o mellor trato para os usuarios e que se respecten as condicións laborais das traballadoras".

Residencia de maiores de Trabada | Fonte: Páxinas Galegas