Por E.P. | Vilalba | 07/06/2016 | Actualizada ás 15:29
O busto do ex-presidente da Xunta Manuel Fraga (PP) e o pedestal sobre o que se atopaba situado na Alameda de Vilalba (Lugo) foron derrubados na madrugada deste martes.
Segundo o alcalde de Vilalba, Gerardo Criado (PP), a Garda Civil abriu unha investigación para determinar o sucedido, tras a denuncia presentada polo Concello, se ben se cre que o busto de bronce co seu pedestal de granito —a parte máis pesada— foron tirados ao chan cuns cables enganchados a un vehículo, "seguramente un todoterreo".
Así, despois de que se dese aviso "a primeira hora da mañá" de que tanto o busto togado de Manuel Fraga como o pedestal estaban tirados polo chan, o Concello de Vilalba deu orde para volver colocalo no seu lugar. Sobre as 9,30 horas deste martes estaba de novo instalado na localidade de nacemento do finado ex-presidente.
O alcalde Gerardo Criado explicou que o busto non sufriu danos significativos e tan só foi necesario volver colocalo na súa localización orixinal.
Este busto, que se atopa fronte a casa natal de Fraga, foi colocado na praza en 1970. A figura xa fora tirada ao río en 2001, tras o cal se optou por reforzar a súa base para mellorar a súa suxeición.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.