Por Galicia Confidencial | Compostela | 08/06/2016 | Actualizada ás 10:00
Francisco Jorquera, quen foi durante os últimos anos o voceiro parlamentario do BNG, será o novo presidente da Fundación Galiza Sempre. Substituirá no cargo a Guillerme Vázquez, que tamén foi portavoz nacional do BNG durante o bipartito.
Ademais, esta fundación incorporarará a Ana Miranda como vicepresidenta. No seu padroado estarán Obdulia Diniz, Montserrat Prado Cores, Xosé Luís Rivas, Mini e Xosé Emilio Vicente Caneda, e continúan Bieito Lobeira, Uxío Breogán Diéguez, María do Carme García Negro e Néstor Rego.
A fundación creada en 1999 desenvolve dúas liñas de actuación prioritarias: unha, dirixida á promoción do pensamento socioeconómico, político e cultural de Galicia, e outra adicada á preservación e difusión da memoria histórica de Galicia e especificamente do nacionalismo galego.
No ámbito do pensamento, a Fundación Galiza Sempre distingue, segundo apunta, tres eixos temáticos “as nacións sen estado, a crítica do neoliberalismo, a desigualdade e a exclusión e social e, en terceiro lugar, as políticas públicas alternativas no ámbito do feminismo, a cultura, a participación cidadá ou as transformacións sociais asociadas ao autogoberno”.
Esta fundación mantén relacións con entidades do País Basco, Catalunya e Portugal, e participa activamente en redes europeas ou no Foro Social Mundial. Está integrada no Centre Maurits Coppieters e é co-fundadora da Rede Mundial polos Dereitos Colectivos dos Pobos canda organizacións doutras nacións sen estado e movementos indixenistas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.