A Xunta atopa unha solución a falta de caixeiros no rural: que as gasolineiras surtan de diñeiro
Abre unha liña de axudas para que as estacións de servizo do rural incorporen tamén un caixeiro bancario.
Por Europa Press / Redacción | SANTIAGO DE COMPOSTELA | 23/06/2025 | Actualizada ás 19:10
O Consello da Xunta aprobou este luns unha nova orde de axudas para a modernización tecnolóxica e dixital das estacións de servizo do rural galego que permitirá, entre outras medidas, que poidan contar cun sistema de retirada de diñeiro en efectivo similar ao que se ofrece nos caixeiros automáticos das sucursais bancarias.
En concreto, o Goberno galego estima unha implantación gradual co horizonte posto en que no ano 2028 preto de 200 gasolineiras -- a metade das que actualmente están adheridas á Federación Galega de Estacións de Servizo (Fegaes)-- poidan contar con el.
O obxectivo é que as persoas que viven en municipios de menos de 20.000 habitantes e que non teñan preto unha sucursal bancaria nin un caixeiro automático poidan achegarse á estación de servizo máis próxima e dispor de pequenas cantidades de diñeiro, "garantindo en todo momento a confidencialidade dos datos bancarios".
A orde, impulsada desde a Consellería de Economía e Industria, conta cunha dotación económica de 800.000 euros e inclúe, xunto coa actuación de disposición de efectivo, axudas para a instalación de grupos electrógenos que garantan a suministración de enerxía eléctrica no caso de producirse un apagamento como o ocorrido o pasado 28 de abril.
BENEFICIARIOS
A nova orde de axudas está dirixida ás pemes legalmente constituídas e aos empresarios autónomos que sexan titulares de estacións de servizos situadas nos concellos galegos de menos de 20.000 habitantes (290 municipios). Cada solicitante poderá presentar unha única petición e esta poderá recoller unha ou varias das actuacións obxecto deste innovador programa de apoios.
Deste xeito, ademais da integración de sistemas e equipamentos para retirar diñeiro en efectivo, poderán solicitarse apoios para mellorar os métodos de pago ou a xestión operativa da propia estación de servizo, así como para a implantación de plataformas dixitais para optimizar o procedemento para a adquisición dos produtos e servizos ofrecidos no establecemento.
Tamén para incorporar sistemas e equipamentos dirixidos á mellora da seguridade das instalacións e aqueles que garantan os servizos ofrecidos pola gasolineira no caso de interrupción da subministración de enerxía eléctrica, ben a través de grupos electrógenos, ben a través de sistemas de alimentación ininterrompida ligados aos equipamentos dixitais.
Así mesmo, poderanse incluír tamén os custos de formación do persoal no uso das novas tecnoloxías e as obras necesarias asociadas á incorporación dos equipamentos mencionados. En canto á contía das axudas, será do 50% do orzamento cun máximo de 30.000 euros por beneficiario, excepto no caso da instalación de grupos electrógenos, na que o apoio se incrementa ata o 80% cun máximo de 5.000 euros por beneficiario.
