A Xunta inicia os orzamentos do 26 cos ollos postos na cambiante situación internacional

O Consello da Xunta deu por iniciado o proceso para elaborar os orzamentos galegos para 2026. Uns orzamentos que, máis que nunca, dependen da cambiante coxuntura internacional, especialmente polas guerras de Ucraína e Irán e os aranceis de Trump, e tamén, da propia situación do Goberno español. Así o sinalou o responsable de Facenda, Miguel Corgos, que reivindicou que "mentres o Goberno central segue cos orzamentos de 2023, a Xunta avanza xa cara aos orzamentos de 2026".

O primeiro trámite foi a orde --que publicará este martes o Diario Oficial de Galicia (DOG)-- de confección de orzamentos, xunto á aprobación do calendario de elaboración do mesmo. Corgos resaltou que Galicia pode empezar estes trámites "grazas á estabilidade política e institucional" e subliñou que a Xunta "quere seguir achegando certidumbres" coa elaboración e aprobación das contas "un ano máis en tempo e forma".

O TEITO DE GASTO, A FINAIS DE XULLO

O comezo do proceso orzamentario dáse "coa normalidade habitual", engadiu, coa previsión de que a finais de xullo se aprobe o teito de gasto e a entrega do proxecto de orzamentos ao Parlamento prodúzase antes do 20 de outubro. O obxectivo final é que os orzamentos autonómicos entren en vigor o primeiro día de 2026 para comezar a súa execución nese momento, incidiu.

Na súa intervención, o mandatario encargado da facenda autonómica referiuse ao contexto, "condicionado por unha serie de incertezas, en primeiro lugar as tensións xeoestratégicas" que se concretan "en situacións bélicas en Ucraína e Oriente Medio". Tamén apuntou ás "tensións comerciais pola cambiante política arancelaria de EE.UU."

Así mesmo, Miguel Corgos fixo referencia á "inestabilidade política de España e do seu goberno", que leva "dous anos sen presentar orzamentos" e que tivo "atrasos na actualización das entregas a conta". Todo iso conduce, segundo Facenda, a "previsións que cambian" en canto ao crecemento, aínda que a consellería conta con que "2026 será un bo ano, aínda así". "Permanecerán moitas das fortalezas da recuperación pospandemia" e é "clave recuperar a produtividade" para que o rebote cíclico se converta en "crecemento estrutural", subliñou.

Así, a Xunta estima que a comunidade seguirá a un "bo ritmo de crecemento" e con creación de emprego, pero está á espera de actualizar as previsións macroeconómicas, algo que fará no momento en que presente o teito de gasto --o informe que o acompaña--. "Imos esperar ata ese momento porque estamos a analizar todos os datos, que son numerosos e cambiantes (...) Como a cifra de crecemento condiciona a recadación fiscal e isto o tamaño dos orzamentos (...), non corramos máis do que podemos e esperemos un mes e medio ao informe para ver o que acontece coas nosas estimacións e coas finanzas galegas", expuxo, ante preguntas dos xornalistas.

AS PRIORIDADES

"Galicia segue funcionando e na orde de mañá --por este martes-- recollemos as prioridades de 2026, condicionadas pola conxuntura económica e ao noso ritmo de crecemento", reiterou o conselleiro.  E sobre se a actual coxuntura internacional pode afectar ás previsións de crecemento, o conselleiro non se quixo mollar. "Iso concretaremolo no informe de finais de xullo porque estamos analizando todos os datos, que son numerosos e cambiantes... Todo o que pasa condiciona a recadación fiscal", engaiu.

Así, enumerou as metas que se pon o Executivo autonómico: aumentar o crecemento potencial mediante a modernización e innovación de sectores produtivos e a xeración de empregos de calidade, acelerar os investimentos en proxectos transformadores relativos a servizos públicos (sanidade, educación e servizos sociais, con especial atención á dependencia), despregar o plan de vivenda aumentando a oferta e permitindo unha mobilidade sustentable, reforzar as políticas de emprego a través da adquisición de novas habilidades e impulso da FP, o retorno de talento e a aposta por un turismo sustentable.