Galicia insiste en pedir "financiamento adicional" para acoller menores migrantes
Por Europa Press / Redacción | SANTIAGO DE COMPOSTELA | 27/06/2025 | Actualizada ás 11:33
A conselleira de Política Social e Igualdade, Fabiola García, insistiu este venres, antes da Conferencia Sectorial da Infancia, en que a Xunta rexeitará "imposicións" do Goberno central con respecto á repartición de menores migrantes e continuará reclamando "financiamento adicional" para atendelos.
Así o manifestou García, en declaracións aos medios durante unha visita a unha farmacia en Santiago previa a participar nesta reunión que comezará ás 11.00 horas e na que se informará ás autonomías sobre o real decreto que regula o procedemento para a recolocación e o traslado de menores migrantes non acompañados en caso dunha situación de continxencia migratoria extraordinaria.
Contra esta normativa, precisamente, o Consello da Xunta aprobou o pasado 16 de xuño interpor un recurso ante o Tribunal Constitucional que xa está presentado. A conselleira pediu ao Goberno estatal que "volva ao día do consenso" e "do diálogo" neste asunto.
Fabiola García recalcou que Galicia "é unha comunidade acolledora", como demostrou nos "últimos anos", pero explicou que estes menores "necesitan unha atención 24 horas ao día" dentro do sistema de protección da Administración autonómica que está ao límite da súa capacidade. Neste contexto, a Xunta aposta "sempre por un sistema de integración plena" para o que pide "financiamento adicional" para poder atendelos.
