Sometida a información pública o proxecto de prolongación da autovía da Costa da Morte
A Administración autonómica prevé un investimento de 36,4 millóns de euros, segundo lembra a consellería nun comunicado de prensa
Por E.P. | SANTIAGO DE COMPOSTELA | 27/06/2025 | Actualizada ás 13:28
A Xunta somete a información pública o proxecto actualizado da prolongación da autovía da Costa da Morte, a AG-55, no tramo entre Santa Irena, en Vimianzo, e a estrada AC-432. A conselleira de Vivenda e Planificación de Infraestruturas, María Martínez Allegue, destacou este venres esta actuación en Vimianzo, despois de anunciala esta semana no pleno do Parlamento.
A Administración autonómica prevé un investimento de 36,4 millóns de euros, segundo lembra a consellería nun comunicado de prensa. O obxectivo desta prolongación, cuxa información pública sae anunciada este venres no Diario Oficial de Galicia (DOG) e estenderase ata o 12 de agosto, é darlle continuidade ao tramo de autovía entre Carballo e Baio, en servizo desde 2016, con case 28 quilómetros libres de peaxe que comunican os concellos de Carballo, Coristanco, Cabana de Bergantiños, Zas e o termo municipal de Vimianzo, ata Santa Irena.
O novo tramo terá unha lonxitude de 5,5 quilómetros, ata a intersección coa AC-432, que comunica Vimianzo e Camariñas. O proxecto inclúe a construción no tramo de dúas ligazóns e a previsión dun terceiro, tres viadutos, seis pasos superiores, tres pasos inferiores e seis obras de drenaxe.
Como explicou a conselleira, a estrutura máis singular será o viaduto sobre o río Vimianzo, que permitirá o cruzamento do viario sobre esta contorna, entre os puntos quilométricos 7+005 e 7+249.
O Goberno galego prevé aprobar definitivamente no próximo mes de setembro e licitar a obra antes de que termine o ano. M. Allegue subliñou o compromiso da Xunta coa comarca e cunha Galicia "vertebrada, ben comunicada e cunhas infraestruturas sustentables e seguras".
Ademais, destacou que a actuación permitirá incrementar a rede viaria autonómica de alta capacidade para mellorar as conexións viarias da Costa da Morte, "dentro da aposta da Xunta por esta comarca e o seu dereito a unha conexión e mobilidade segura".
A conselleira afirmou que a prolongación é posible polo rescate que fixo o Goberno galego dos contratos de concesión das autoestradas do Salnés, Barbanza, Ourense-Celanova e Santiago-Brión.
