A folga en Correos rexistra un “amplo seguimento", segundo a CIG
O persoal do sector desenvolveu unha concentración ante a sede central da empresa pública en Santiago.
Por Europa Press / Redacción | SANTIAGO DE COMPOSTELA | 27/06/2025 | Actualizada ás 16:22
A xornada de folga convocada este venres pola CIG no servizo de Correos en Galicia rexistrou un "amplo seguimento" entre o persoal do sector, que aproveitou para desenvolver unha concentración ante a sede central da empresa pública en Santiago. Con estas mobilizacións, a central sindical mostra o seu rexeitamento ao acordo marco asinado por CC.OO., UXT e CSIF, que suporá, segundo advirte, "perda de dereitos laborais" e "non inclúe melloras salariais vinculadas ao IPC nin recupera o poder adquisitivo perdido".
A convocatoria deste paro de 24 horas tivo réplica noutros territorios da man de distintas organizacións sindicais. Pola súa banda, CIG-Correos sinala que CC.OO., UXT e CSIF están citados este luns para ratificarse na negociación do acordo e comezar coa segunda fase do proceso.
