O Goberno impulsa con 100 millóns a reciclaxe de paneis solares, baterías e aeroxeradores

O Ministerio para a Transición Ecolóxica e o Reto Demográfico (Miteco) vén de anunciar a posta en marcha da primeira convocatoria do programa 'Renocicla', unha iniciativa con 100 millóns de euros en axudas destinadas á reutilización e reciclaxe de bens de equipo vinculados ás enerxías renovables. Esta actuación insírese no marco do Plan de Recuperación, Transformación e Resiliencia (PRTR) e será xestionada polo Instituto para a Diversificación e Aforro da Enerxía (IDAE).

Segundo recolle o propio Ministerio, trátase dunha medida pioneira en España que pretende impulsar "unha cadea de valor industrial arredor do tratamento avanzado e a reutilización de residuos tecnolóxicos renovables", contribuíndo así á consolidación dunha industria verde e sustentable.

A maior parte do orzamento, uns 80 millóns, irá dirixida a proxectos centrados en paneis solares fotovoltaicos, baterías de litio e pas de aeroxeradores. O obxectivo é apoiar tanto novas instalacións como actuacións que permitan reutilizar ou reciclar estes compoñentes tras o remate da súa vida útil.

Priorizaranse as propostas con tecnoloxías máis avanzadas de reciclaxe e que logren altas taxas de recuperación de materiais, entre o 65% e o 85% segundo o tipo de equipo, con especial atención a elementos valiosos como o litio.

O resto do orzamento, 20 millóns de euros, reservarase para proxectos que promovan o deseño ecolóxico de compoñentes e a incorporación de materias primas secundarias nos procesos de fabricación. Estes proxectos deberán contribuír á prolongación do ciclo de vida dos equipamentos e á redución da xeración de residuos.

Tamén se valorará a capacidade de integración de criterios de sustentabilidade nas fases de produción, uso e retirada de equipos renovables, incentivando así un modelo máis circular e eficiente.

O prazo para presentar solicitudes abrirase o 8 de xullo e permanecerá activo ata o 16 de setembro. As axudas serán a fondo perdido e outorgaranse en réxime de concorrencia competitiva, segundo criterios como o rigurosidade técnica, viabilidade económica ou o grao de innovación.

Esta nova convocatoria sitúa o Estado español nun camiño cara á consolidación dunha industria renovable sostible, promovendo tanto a xestión responsable dos residuos tecnolóxicos como a autonomía na recuperación de materiais estratéxicos.