Brote de salmonelose nun festival celebrado en Oza-Cesuras, con 94 persoas afectadas
Sobre as evidencias recollidas ata o momento, Sanidade sinala que "fan pensar nunha orixe bacteriana".
Por Europa Press / Redacción | A CORUÑA | 30/06/2025 | Actualizada ás 14:11
A Consellería de Sanidade, a través da Dirección Xeral de Saúde Pública, investiga a causa dun brote de salmonelose detectado en Oza-Cesuras, con 94 persoas afectadas, segundo a información facilitada polo departamento autonómico. En relación ao mesmo, sinala que se están realizando enquisas epidemiolóxicas entre os afectados para poder identificar a orixe da intoxicación alimentaria que se produciu nun festival celebrado no municipio coruñés.
Sobre as evidencias recollidas ata o momento, Sanidade sinala que "fan pensar nunha orixe bacteriana" e engaden que se está investigando os posibles alimentos que causaron o brote e os establecementos implicados. Ademais, indica que está en contacto co Concello de Oza-Cesuras como responsable da autorización do evento para poder identificar os operadores de restauración que se instalaron no festival celebrado no municipio esta fin de semana.
Os afectados foron derivados a hospitais da Coruña como o complexo hospitalario universitario (Chuac) e HM Hospitais. Desde este centro, consultados por Europa Press, indicaron que atenderon 26 pacientes, ningún con cadro grave. Deles, 25 foron derivados a casa cun tratamento específico e cunha persoa en urxencias en observación. No Chuac, atenderon a máis de 50 persoas.
