Feijóo vístese de gandeiro

O presidente galego critica aos "supermanes da política" e "aos novos apóstolos do medio rural que veñen do campus da Complutense", mentres busca a foto electoral nunha explotación con moi poucas vacas.

Por Galicia Confidencial | Lugo | 12/06/2016 | Actualizada ás 18:00

Comparte esta noticia

Chegan as eleccións e o PPdeG desembarca no campo, especialmente, o seu líder, Alberto Núñez Feijóo, a quen lle gusta ter a foto rodeada de vacas. Xo fixo na campaña das autonómicas de 2009, nas anteriores xerais e nestas.

Feijóo visitanto unha granxa de vacas
Feijóo visitanto unha granxa de vacas | Fonte: FdV

A anécdota foi hai sete anos, cando o entón líder da oposición preguntou ao propietario dunha explotación "por que as vacas tiñan nome de muller". A pregunta do dirixente popular e a graciosa resposta do gandeiro --quen alegou que non lles ía a pór nome de home porque eran "vacas"--, encheu entón as crónicas dos xornais e aínda que a contorna de Feijóo aclarou despois que o presidente quixo preguntar "por que non recibían nomes como Loura ou Galega", como é habitual en Galicia, permanece no imaxinario popular.

O peso desta anécdota, que hoxe moitos no PPdeG lembran mesmo con agarimo, non impediu que Feijóo continúe cos seus actos para os sectores gandeiro e lácteo nin como presidente nin como líder do PPdeG. E nesta nova carreira cara ás urnas, decidiu empezar, segundo as súas propias palabras, "polo principio" de Galicia, que "segue sendo o medio rural".

Así, tras unhas semanas de precampaña con intensa aprobación de medidas sociais, para os empregados públicos e tamén para o sector primario, Feijóo lanzouse de cheo a por o voto rural, tradicional caladoiro para os populares en provincias como Lugo e Ourense, e tamén un asidero para poder concentrar as súas críticas nos partidos emerxentes.

Preparando as vacas e a palla

E para lanzar esta mensaxe, os populares habilitaron un microfóno con pé nun corredor dunha explotación de Lugo, no que podían verse vacas a ambos os dous lados: unha tradicional imaxe de campaña. De feito, xusto antes da chegada do presidente, houbo un momento de preocupación cando algúns membros do seu equipo de campaña decatáronse de que había "poucas" vacas na contorna.

Alberto Núñez Feijóo con Raquel Arias, Elena Candia e outros dirixentes do PP de Lugo nunha explotación gandeira / EP Feijóo con Elena Candia, Raquel Arias e outros dirixentes do PP de Lugo nunha explotación gandeira / EP
Alberto Núñez Feijóo con Raquel Arias, Elena Candia e outros dirixentes do PP de Lugo nunha explotación gandeira / EP Feijóo con Elena Candia, Raquel Arias e outros dirixentes do PP de Lugo nunha explotación gandeira / EP

O problema foi solucionado por membros da cooperativa, que sementaron de palla e penso a zona máis próxima ao seu micrófono para que a Feijóo non lle faltase compañía nas súas declaracións. A manobra de atracción funcionou e algunha vaca puido probar, ademais do penso, o sabor do trípode das cámaras, gañándose o favor e as fotografías dos xornalistas.

Críticas a Podemos

Acompañado dos candidatos Joaquín García Díez e José Manuel Barreiro, entre outros dirixentes do PP de Lugo, Feijóo agradeceu que lle propuxesen empezar a campaña "polo principio", nunha explotación láctea e asegurou que asume, "desde o primeiro instante", un "compromiso explícito" co sector: o de non usar as súas "dificultades" para recoller "un puñado de votos".

Asumido o compromiso, a continuación, centrouse en atacar aos seus rivais políticos, quen, ao seu xuízo, si o fan. Sobre todo, censurou que "xente á que nin lle interesa o leite, nin coñece unha explotación, nin lle interesa nada o rural galego porque nunca viviu nel" utilice "os problemas do prezo do leite". E é que, para Feijóo, o rural é "a alma e o corazón" de Galicia. Un rural que, curiosamente, protagonizou as principais protestas contra o seu goberno, precisamente, polos baixos prezos do leite.

Concentrado en Podemos como principal obxectivo político a bater, o presidente galego proclamou que non cre "nos homes todopoderosos, nin nos supermanes das políticas, nin nos novos apóstolos do medio rural que veñen do campus da Complutense, nin tampouco nas súas franquías".

"Cremos nos gandeiros de verdade, nos que coñecen ben esta terra e van seguir apostando por ela. Porque nós somos deses. Somos deste pobo, criámonos nel e seguiremos defendéndoo fronte aos supermanes da política e aos apóstolos da universidade de Madrid", reivindicou, identificando, unha vez máis, ao PP como o partido do rural.Un mundo rural ao que el se gaba de pertencer, pero co que non empatiza, a diferencia do que acontecía co seu predecesor, Manuel Fraga.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta