Así se poderá gastar o bono peixe de 50 euros da Xunta

O Bono Peixe da Xunta poderá descargarse a partir do 28 de xullo, dotado con ata 50 euros por beneficiario, para fomentar o consumo de peixes e mariscos en supermercados de Galicia. Estes bonos poderán descargarse na plataforma www.bonopeixe.gal ou a través da aplicación móbil, dispoñible para dispositivos Android e iOS, deseñada especificamente para esta acción.

O Consello da Xunta deste luns aprobou a orde da posta en marcha deste bono que conta cun orzamento de 2,5 millóns de euros. A conselleira do Mar, Marta Villaverde, foi a encargada de debullar esta medida "pioneira" coa que se prevé mobilizar 10 millóns e beneficiar a 150.000 persoas.

O presidente do Executivo autonómico, Alfonso Rueda, destacou esta medida como unha "chamada de atención" ante o descenso de consumo de peixes, polo que pon en valor a súa "efectividade" na mellora de hábitos de consumo saudable.

DESCONTOS DE 5 EUROS POR SEMANA

Este bono poderá usarse a razón de cinco euros por semana --con descontos do 25% da compra de ata un máximo de cinco euros--, cunha acumulación do importe non gastado nas sucesivas semanas ata un máximo de 25 euros, que poderán gastarse ao longo dun total de 10 semanas ou ata que se esgote o crédito.

A orde será publicada no Diario Oficial de Galicia (DOG) do 10 de xullo. O 11 de xullo abrirase o prazo para que se adhiran establecementos interesados --hai máis de 1.600 posibles en Galicia--. O Goberno galego indica que xa mostraron interese as principais cadeas de distribución e venda de peixe.

Sardiñas nas pescaderías da Praza de Lugo | Fonte: M. Dylan - Europa Press - Arquivo