A Xunta reclama información "oficial" sobre a situación dos bidóns radiactivos na Foxa Atlántica
Nunha resposta a unha pregunta do BNG no pleno do Parlamento sobre se o Goberno galego "vai facer algo" para que se investigue o control dos residuos na fosa atlántica, Vázquez reivindicou que Galicia "quere coñecer e facer seguimento de posibles actuacións" que se realicen neste ámbito "desde un punto de vista técnico e ambiental dos residuos"
Por Europa Press / Redacción | SANTIAGO DE COMPOSTELA | 09/07/2025 | Actualizada ás 18:06
A conselleira de Medio Ambiente e Cambio Climático, Ángeles Vázquez, volveu a reclamar ao Goberno central "información oficial" sobre os bidóns radioactivos localizados por unha expedición francesa fronte á costa galega.
Nunha resposta a unha pregunta do BNG no pleno do Parlamento sobre se o Goberno galego "vai facer algo" para que se investigue o control dos residuos na fosa atlántica, Vázquez reivindicou que Galicia "quere coñecer e facer seguimento de posibles actuacións" que se realicen neste ámbito "desde un punto de vista técnico e ambiental dos residuos".
Ademais, asegurou que a Administración autonómica coñece o traballo da expedición francesa "a través dos medios" e cuestionou ao Bloque se a formación nacionalista sabíao "porque forman parte do Goberno central".
"A Xunta actuou con dilixencia e rigor", reivindicou a titular de Medio Ambiente, que tamén lembrou que o día 1 de xullo o Consello de Seguridade Nuclear informou de que os niveis de radioactividade "están por baixo dos límites legais e dos niveis considerados nocivos".
Pola súa banda, Rosana Pérez (BNG) acusou ao Goberno galego de "cruzarse de brazos" e de "non facer valer a protección de verteduras tan preto de Galicia".
Con anterioridade, a deputada nacionalista reprochou a Ángeles Vázquez que ante un asunto "moi preocupante" a responsable autonómica "presume de descoñecemento nas súas redes sociais".
"De brazos cruzados nada", replicou Vázquez, que insistiu en que desde o primeiro momento solicitaron información ao Goberno central sobre a expedición e "eles teñen a obrigación de realizar de maneira continuada a vixilancia radiológica ambiental en todo o litoral".
