Por Galicia Confidencial | Santiago | 19/06/2016 | Actualizada ás 16:40
Centos de persoas manifestáronse este domingo en distintas localidades galegas para denunciar a "intolerable situación" que viven as persoas refuxiadas e pedir que se revise "en profundidade" a política migratoria e exterior da Unión Europea. Baixo o lema 'Non ás guerras. Rachemos coas fronteiras', os manifestantes concentráronse en Santiago de Compostela, A Coruña, Ferrol, Pontevedra e Vigo, convocados pola Rede Galega en Apoio ás Persoas Refuxiadas, con motivo da celebración este luns, día 20 de xuño, do Día Mundial das Persoas Refuxiadas.
"Estas mobilizacións representan o berro da cidadanía galega ante estas inxustizas", comentou a Europa Press un dos portavoces da Rede, Miguel Fernández, durante a súa participación na marcha celebrada na capital galega.
Fernández criticou que a política que se aplica ás persoas refuxiadas é a "mesma" que se emprega cos emigrantes e, na súa opinión, "impide que as persoas se movan de forma normalizada".
Tras a chegada dos participantes á Praza de Praterías, a moza sirio galega Nour Ao-Hussen foi a encargada de ler o manifesto do colectivo despois das intervencións de varias persoas que participaron como voluntarias en distintos campamentos de refuxiados nas fronteiras con Europa, que relataron as súas experiencias.
DEMANDAS DA REDE
As demandas dos 70 colectivos que conforman a rede para "esixir a garantía e o cumprimento dos dereitos dos refuxiados" pasan por revisar, "en profundidade", a política migratoria e exterior europea, que "dilapida millóns de euros nunha sinistra infraestrutura de vixilancia, disuasión e control" mentres "elude calquera xestión global que antepoña a vida das persoas".
Tamén piden "ampliar e axilizar o sistema de asilo" para as persoas que xa están en España e Galicia e que "actualmente están pendentes de ser atendidas" a través do reforzo da Oficina de Asilo e Refuxio do Ministerio do Interior e persoal "debidamente formado" nas Oficinas de Estranxeiría, para conseguir unha "maior axilidade" nas entrevistas de solicitude.,
Así mesmo, reclaman que as administracións asuman que son elas as "responsables" de "garantir os dereitos" dos refuxiados e de promover a súa autonomía" e demandan á Xunta que poña a disposición destas persoas "recursos que tamén beneficien ao conxunto das persoas en situación de pobreza ou exclusión".
Por último, demandan a recuperación e os fondos de cooperación e programas de atención á poboación de orixe estranxeira "previos aos recortes" ao considerar que "son imprescindibles para mellorar a situación nos países de orixe" e para "construír unha sociedade xusta e cohesionada".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.