Matan a unha traballadora de axuda en domicilios do Porriño

Unha muller de 48 anos, natural de Mos (Pontevedra), que traballaba no Servizo de Axuda do Fogar (SAF) do Porriño morreu de forma violenta nunha das casas ás que acudía con regularidade no municipio situada na parroquia de Atios.

Segundo informou o subdelegado do Goberno, Abel Losada, efectivos da Garda Civil investigan o crime, cuxo suposto autor sería un septuaxenario que residía na vivenda, o marido dunha muller que padecía "unha enfermidade incapacitante" e que era, segundo precisou o alcalde do Porriño, Alejandro Lorenzo, aos medios, a que tiña concedida a prestación do SAF.

A anciá, segundo o rexedor, era desprazada a un centro de día da localidade ao que tamén sería trasladada nesta mesma xornada. Nel permanecerá ata as 19,30 horas e o Concello trasladou aos seus familiares a súa disposición a colaborar se é preciso. O marido da muller, suposto autor do crime, mataría á traballadora á primeira hora da mañá deste martes cunha machada ou un obxecto similar co que lle deu un forte golpe na cabeza.

En declaracións aos medios, Losada explicou que no domicilio residía un matrimonio maior composto por unha muller que padece "unha enfermidade incapacitante". Tamén ratificou que o seu marido foi achado no lugar, "con manchas de sangue, desorientado e realizando manifestacións incoherentes". Así mesmo, clarificou que a falecida non figura na base de datos de Viogen e que, en principio, "non hai ningún indicio que apunte cara á violencia de xénero como causa dos feitos".

DETIDO INGRESADO NUN CENTRO MÉDICO

A Garda Civil, á espera dos resultados da autopsia, xa realizou a comprobación da escena e instrúe as dilixencias para o completo esclarecemento dos feitos. Fontes consultadas por Europa Press indicaron que foi detido e ingresado nun centro médico. A preguntas dos medios sobre se hai constancia de que o home padecese algún problema neurodegenerativo, o alcalde indicou que podía haber algún comentario, pero non ten constancia dunha enfermidade concreta.

CONCENTRACIÓN ESTE MARTES

O rexedor explicou que este martes ás 20,00 horas haberá unha concentración cun minuto de silencio, no que tamén haberá representación do Concello de Mos, de onde procedía a vítima, aínda que levaba "anos" empadroada no Porriño.

Así mesmo, trasladou o pésame á familia e achegados da traballadora e asegurou que non tiña coñecemento de ningunha "situación irregular" ou problema en relación á atención no domicilio no que, "sobre as 9,00 horas" deste martes, unha familiar do matrimonio deu a voz de alerta da morte violenta da traballadora.

CONCENTRACIÓNS O MÉRCORES

A CIG e Comisións Obreiras (CC.OO.) convocaron para este mércores, 30 de xullo, dúas concentracións no Porriño en repulsa pola morte violenta dunha traballadora do Servizo de Axuda no Fogar (SAF), presuntamente asasinada polo marido da usuaria á que atendía. A CIG celebrarase ás 12.00 horas diante do Concello para esixir protocolos contra o acoso laboral e medidas de protección efectivas, mentres que CC.OO. fixou a súa protesta para as 20.00 horas no mesmo lugar. Ambas organizacións sindicais denuncian a precariedade e a falta de prevención de riscos nun sector altamente feminizado e vulnerable.

A CIG esixiu responsabilidades á empresa concesionaria e alertou sobre a ausencia histórica de medidas fronte ao acoso e ás agresións no SAF. Pola súa banda, CC.OO. cualificou de “abandono institucional” a situación das traballadoras, que prestan servizo sen avaliación de riscos nin protocolos de actuación. O sindicato lamenta que o sector siga invisibilizado e sen protección efectiva. Ademais, o goberno local do Porriño convocou para este martes un minuto de silencio en memoria da vítima, ao que está previsto que asista a conselleira de Política Social e Igualdade, Fabiola García.

RESPOSTA DA XUNTA

O Goberno galego trasladou o seu "máis firme condena" ante "o tráxico suceso" rexistrado no Porriño. Así mesmo, trasladou as súas condolencias aos familiares e achegados da vítima.

Ao tempo, a Consellería de Política Social e Igualdade informou de que está "en contacto permanente" co Concello do Porriño. O seu obxectivo, explicou, é garantir "a atención necesaria" á persoa en situación de dependencia, a muller do suposto autor do crime. Fontes consultadas por Europa Press avanzaron, ademais, que a conselleira de Política Social, Fabiola García, prevé acudir ao minuto de silencio convocado na localidade pontevedresa para este martes ás 20,00 horas.