A Xunta critica a acollida de menores migrantes: “Galicia non aceptará imposicións, ameazas nin insultos"
Fabiola García insiste en que o sistema ten "unha sobreocupación do 108 %".
Por Europa Press / Redacción | SANTIAGO DE COMPOSTELA | 28/08/2025 | Actualizada ás 17:52
A conselleira de Política Social e Igualdade, Fabiola García, lanzou este xoves unha contundente mensaxe ao Goberno de España durante a súa visita ao Centro Infantil e Xuvenil Príncipe Felipe, en Pontevedra, no que advertiu de que Galicia "non aceptará imposicións, nin ameazas nin insultos" en relación ao traslado de menores migrantes non acompañados á Península.
Durante a súa intervención, a conselleira criticou a falta de diálogo, planificación e financiamento por parte do Executivo que preside Pedro Sánchez, de quen lamentou que "prefira a intimidación ao consenso" nunha cuestión tan sensible como o coidado de menores en situación de vulnerabilidade.
Fabiola García censurou que, a día de hoxe, ningunha Comunidade Autónoma sabe cantos menores se van trasladar, cando se fará nin cales son as súas necesidades educativas, sanitarias ou sociais. Así mesmo, denunciou que o Goberno central negociou esta medida "cos seus socios", pero "en contra da maioría de Comunidades Autónomas", e rexeitou que estas teñan que asumir en solitario os custos da acollida. Neste sentido, alertou de que a rede de protección de Galicia "está ao máximo da súa capacidade" e volveu a acusar o Executivo central de querer "crear guetos" coa súa xestión unilateral.
Segundo lembrou, tanto Comunidades gobernadas polo PP como polo PSOE recorreron ante o Tribunal Constitucional por considerar "totalmente inaceptable" a actuación do Goberno neste ámbito. Nese sentido, tamén rexeitou as "ameazas" do ministro Torres de facer actuar ás forzas policiais, e constatou que o Goberno "é moi bravo con algunhas Comunidades e moi baixo con outras, como País Vasco ou Cataluña".
A conselleira subliñou que Galicia é unha Comunidade "solidaria" e "acolledora", pero o seu sistema de protección ten actualmente unha "sobreocupación do 108 %". "O Goberno sabe moi ben que Galicia non ten nestes momentos capacidade de acollemento e capacidade residencial", reafirmou sobre os plans de enviar a 317 mozos á Comunidade.
CENTRO PRÍNCIPE FELIPE
Fronte a iso, Fabiola García defendeu o modelo galego, baseado na colaboración institucional, e puxo como exemplo a renovación do convenio entre a Xunta e a Deputación de Pontevedra para asegurar a continuidade dos servizos de acollemento residencial e atención diúrna no Centro Príncipe Felipe durante os próximos catro anos. O acordo contempla un investimento autonómico de 11,2 millóns de euros ata 2029.
O centro Príncipe Felipe, xestionado en coordinación coa Deputación, funciona baixo un modelo de atención especializada, articulado en pequenos fogares ou unidades de convivencia adaptadas ás idades e necesidades dos menores, e atende a uns 200 mozos. Na visita deste xoves participaron tamén o director xeral de Familia, Infancia e Dinamización Demográfica, Jacobo Rei; a deputada provincial de Igualdade e Benestar Social, Sandra Bastos; e a directora do centro, Ana Amoedo.
