A CIG alerta pola incertidume laboral polo peche da base de Ryanair en Santiago

A Confederación Intersindical Galega (CIG) manifestou a súa "preocupación" polos postos de traballo ante o peche da base de Ryanair en Santiago de Compostela. Polo momento descoñécese se esta decisión afectará ao persoal de terra.

Fontes consultadas da CIG, trasladaron a Europa Press que se confirmou que a tripulación de aire verase afectada, neste caso coa posibilidade de realizar un cambio de base. No entanto, isto supón irse fóra de Galicia, o que "trastornaría a moitas persoas que teñen aquí a súa vida".

Polo momento, son dous avións os que deixarían de pasar a noite na capital galega. Un "gran recorte", que xera "preocupación e medo" entre os traballadores, uns 92 aproximadamente entre a pasaxe e rampla. A CIG explicou que se atopan á espera de coñecer a programación de inverno, porque se van a "reducir moito" os voos que cheguen a Santiago.

PP PIDE PARALIZAR AS TAXAS

O Partido Popular criticou que o Goberno carece dunha estratexia efectiva para frear a caída de pasaxeiros e rutas aéreas, coincidindo coa redución de servizos de Ryanair para este inverno. A formación pediu paralizar a subida do 6,5 % das taxas aeroportuarias para 2026 e sinalou que os recentes recortes son “a proba” de que o actual sistema de incentivos non funciona, ao non evitar perdas de voos nin retrocesos en conectividade.

Os populares cargaron contra o ministro de Transportes, Óscar Puente, polas súas “promesas baleiras”, e propoñen un gran acordo coas aerolíneas no marco do Documento de Regulación Aeroportuaria III (DOURA III) para garantir estabilidade e competitividade. Ademais, criticaron que a subida de taxas por parte de Aena, con beneficios históricos de 1.934 millóns de euros en 2024, terá consecuencias graves, encarecendo billetes e afectando especialmente aos aeroportos de zonas despobladas.

ABEL CABALLERO REPROCHA A RYANAIR

O alcalde de Vigo, Abel Caballero, subliñou que o goberno local "xa non tiña intención" de renovar o convenio municipal con Ryanair, que expira a final de ano, e lembrou que o Concello impuxo dúas sancións á aerolínea por incumprimentos do acordo, por valor de máis de 67.000 euros. O rexedor explicou que o contrato, adxudicado por case 2 millóns de euros para a promoción turística da cidade nos voos entre Peinador e Londres (2023-2025), foi "severa e seriamente incumprido", polo que o goberno seguirá esixindo o pago das sancións e demais incumprimentos. Caballero engadiu que, a pesar da saída de Ryanair, o Concello continuará promocionando Vigo, onde o turismo "vai extraordinariamente ben", e acusou á Xunta de facer competencia desleal ao aeroporto de Santiago.

Pola súa banda, a oposición reaccionou con críticas contundentes. O PP de Vigo cualificou a saída de Ryanair como consecuencia da falta de interese do goberno local e de Aena en potenciar aeroportos periféricos, advertindo do risco para a única conexión internacional de Peinador. Mentres, o BNG sinalou que a marcha da aerolínea demostra o "fracaso" do modelo de subvencións a rutas aéreas e reclamou un plan de dinamización de Peinador coa participación de Concello, Xunta e Estado, lembrando que a verdadeira competencia da terminal viguesa é Sá Carneiro, no Porto de Portugal.

A SUBIDA DAS TAXAS DE AENA

A concelleira de Turismo e voceira do goberno de Santiago, Míriam Louzao, advertiu que o peche da base de Ryanair en Lavacolla e a redución de rutas e prazas anunciadas pola aeroliña afectan de forma directa á conectividade da cidade e do conxunto de Galicia. Louzao vinculou esta decisión coa subida de taxas prevista por Aena para 2026, que, ao seu ver, vai "en contra" do desenvolvemento de aeroportos medianos e pequenos, como o Rosalía de Castro. O executivo compostelán considera que esta situación volve poñer sobre a mesa a necesidade dun plan estratéxico galego para as terminais aéreas, coordinado pola Xunta e pactado cos tres concellos con aeroporto.

O goberno local recoñeceu a súa preocupación polo persoal de Ryanair e, desde a perspectiva turística, lembrou que, aínda que de momento as cifras de estancia se manteñen respecto ao pasado ano, a perda de rutas terá consecuencias na oferta de conexións. En concreto, Ryanair cancela os voos con Madrid, Barcelona, Málaga, Alacante, Gran Canaria, Palma e Zaragoza, ademais de reducir prazas noutras ligazóns. A capital galega quedará sen conexión con Zaragoza e Alacante, aínda que outras compañías seguirán operando as rutas principais.

AENA ACUSA A RYANAIR DE "FARISEÍSMO"

O presidente de Aena, Maurici Lucena, lanzou unha dura crítica contra Ryanair, á que acusa de actuar con “mala educación, chantaxe e deshonestidade” para obter vantaxes económicas. Nun extenso comunicado, o máximo responsable do xestor aeroportuario rexeitou as declaracións do CEO da aeroliña, Eddie Wilson, quen asegurara que “España está pechada ao turismo” malia que as previsións superan os 100 millóns de visitantes en 2025. Lucena cualificou estas palabras de “falseamento da realidade” e asegurou que Ryanair tenta condicionar gobernos europeos mediante presións e ameazas, incluíndo a España.

O epicentro do conflito está na subida de 0,68 euros das tarifas aeroportuarias prevista para 2026, que Aena defende como “insignificante” fronte ao 21% de incremento aplicado por Ryanair nos billetes o último ano. Lucena denunciou que a compañía busca subvencións públicas para aeroportos rexionais e que as súas cifras están “distorsionadas” en relación coa programación oficial. Concluíu que Aena non aceptará unha relación de “vasalaxe” cunha soa aeroliña e defendeu o actual modelo en rede, que garante a vertebración territorial sen recorrer ao diñeiro dos contribuíntes.

RUEDA CULPA AO GOBERNO CENTRAL 

O Goberno que dirixe Alfonso Rueda vinculou implicitamente a decisión ratificada este mércores por Ryanair co "trato" que Aena proporciona a aeroportos medianos e pequenos como os situados na comunidade galega e que esixe "cambiar". Con tal fin, urxiu que se reúna o comité de coordinación aeroportuaria. O conselleiro de Presidencia, Diego Calvo, convocou aos medios para situar á Xunta despois de que Ryanair confirmase a súa intención de pechar a súa base de Santiago e eliminar todos os voos a Vigo e Tenerife Norte.

Calvo salientou que as competencias do tráfico aéreo son do Estado, do mesmo xeito que "a propiedade de todos os aeroportos hai en España" e que Aena "é unha empresa que opera en réxime de monopolio" no país e cuxa "participación máxima é do Estado, polo que pode considerarse a tales efectos como unha empresa pública". Ademais, lembrou que existe un comité de coordinación aeroportuaria en Galicia "que preside a propia Aena" e que, "cada certo tempo, convócase nas propias instalacións de Aena"; á vez que se centrou en denunciar "o trato que o Goberno dispensa aos aeroportos medianos e pequenos", como son os tres galegos --os de Lavacolla, Peinador e Alvedro--, a través de Aena.

Así, recalcou que, a xuízo da Xunta, dado que Aena é "unha empresa pública", debería ter "entre os seus principais obxectivos" o de "profundar no reequilibrio territorial en toda España" e apostar polos aeroportos medianos e pequenos no canto de por as grandes terminais que "funcionan soas". "E primar o interese público, sobre todo no caso do transporte aéreo", aseverou, antes de queixarse que, con todo, "Aena está centrada única e exclusivamente en conseguir máis beneficios. O ano pasado tivo uns beneficios de máis de 1.900 millóns de euros", sentenciou.

REUNIÓN URXENTE

A continuación, Calvo anticipou que a Xunta pedirá unha reunión urxente do comité de coordinación aeroportuaria, onde está presente Aena, para esixirlle un cambio na súa política en relación aos pequenos e medianos aeroportos. En concreto, o Executivo autonómico demandará este cambio para as terminais galegas, pero o conselleiro deu por feito que outros gobernos autonómicos darán pasos semellantes. Sobre se a Xunta pode dar algún paso, pola súa banda, para tratar de reverter a situación e atraer outras aerolíneas ou manter a oferta dada a caída de viaxeiros, Calvo replicou que o que pretende Aena é que "ese traballo" o fagan as comunidades ou concellos que son base de aeroportos (A Coruña, Santiago e Vigo, no caso galego).

"Non compartimos iso. Isto é unha competencia de Aena. Os aeroportos son de Aena. A competencia no tráfico aeroportuario é de Aena. E quen ten que levar a cabo ese traballo de potenciar os aeroportos medianos e pequenos, e potenciar ese reequilibrio é Aena", sentenciou. Ao seu modo de ver, "o que non pode ser" é que "se centre en conseguir maximizar os seus beneficios e que non leve a cabo unha política comercial que favoreza o reequilibrio. Si o fan, contrapuxo, "outro tipo de entidades públicas, como as autoridades portuarias", antes de engadir que "Aena tería que facer o mesmo".

PROMOCIÓN TURÍSTICA

Ante a insistencia dos medios en que a Xunta si participa activamente, por exemplo, na promoción de novas conexións, Calvo esgrimiu que a Xunta "si fai promoción turística", no que respecta a favorecer que turistas ou persoas doutros lugares poidan "achegarse e coñecer Galicia". "Por iso nós entendemos que a promoción turística que ten que levar a cabo unha comunidade é promoción en orixe. É dicir, tentar que xente de Gran Bretaña, Francia, Alemaña, Italia, Estados Unidos... decida pasar as súas vacacións ou visitar Galicia. O medio co que decida chegar aquí, loxicamente, é unha decisión deles", explicou. "Pero no caso da navegación aeroportuaria é unha competencia única e exclusivamente do Estado. Por iso pedímoslle que a tome en serio", resolveu.