Bruxelas autoriza a entrada do fondo Swiss Life no grupo Itínere: faise co control da AP-9, a AG-57, a AG-55 e a AP-53

A Comisión Europea deu este venres luz verde á entrada do fondo Swiss Life no control do grupo español de autoestradas Itínere xunto ao fondo holandés APG, tras concluír que a operación non terá un impacto negativo no espazo económico europeo nin nunha parte substancial do mesmo.

Desta forma, APG, o maior provedor de pensións dos Países Baixos, e Swiss Life Holding A.G., a compañía máis grande de Suíza especializada en seguros de vida, fanse coa concesión da AP-9 (que vertebra o eixo atlántico), AG-57 (Vigo-Baiona), AG-55 (A Coruña-Carballo) e AP-53 (Santiago-Dozón), así como a AP-66, de Asturias a León; a AP-8, en País Vasco; ou a AP-15, en Navarra.

Bruxelas considera que a operación non expón problemas de competencia porque as compañías implicadas non están activas nos mesmos mercados nin teñen vínculos verticais, segundo detallou nun comunicado. O expediente, que lle foi notificado ao Executivo comunitario o 12 de agosto pasado, foi examinado baixo o procedemento simplificado que se aplica aos casos menos problemáticos.

Coches nunha peaxe en autoestrada | Fonte: Xunta de Galicia - Arquivo