Dubioza Kolektiv, The Rapants e Buhos, entre as propostas da primeira xornada do festival Revenidas
Os abonos para as tres xornadas do Revenidas e as entradas por día seguen á venda na páxina web www.revenidas.com e a partir das 12 do mediodía do xoves tamén na billeteira do festival.
Por Europa Press / Redacción | PONTEVEDRA | 10/09/2025 | Actualizada ás 14:43
Dubioza Kolektiv, The Rapants, Buhos, Sanguijuelas del Guadiana e The Baboon Show, son algunhas das propostas da primeira xornada do Revenidas. Tal e como destacan nun comunicado, as primeiras notas musicais do Revenidas sairán desde La Duendeneta, como xa é tradición. Será ás 17.50 horas, coincidindo coa apertura de portas. A partir dese momento e ata as catro da madrugada a música non deixará de soar nos dous escenarios do festival de Vilaxoán.
Nesta primeira xornada, destacan propostas internacionais de música festiva e combativa como a dos bosníacos Dubioza Kolektiv ou de punk rock en estado puro, como a da banda sueca The Baboon Show ou os neozelandeses Dick Move. Tamén nomes consagrados da escena estatal, como os cataláns Buhos, con máis de 1.400 concertos ás súas costas; figuras emerxentes desa mesma escena cunha proxección exponencial, como os estremeños Sanguijuelas del Guadiana. Destacan tamén as propostas dos grupos e artistas galegos, como The Rapants, Hugo Guezeta, Galician Army e a propia Duendeneta, con Carlos Crespo e Kris K Dj aos mandos.
O festival Revenidas conta co apoio de Vibra Mahou, a plataforma de música de Mahou Cinco Estrelas, a Xunta de Galicia a través da Axencia de Turismo de Galicia, no marco de Concertos do Xacobeo. Os abonos para as tres xornadas do Revenidas e as entradas por día seguen á venda na páxina web www.revenidas.com e a partir das 12 do mediodía do xoves tamén na billeteira do festival. As persoas que compren o abono tamén poderán reservar na web o acceso á acampada na Pelada por un importe de 15 euros, con servizo circular de bus gratuíto.
