Gaza e os incendios marcan o pleno do Parlamento galego

A situación en Gaza marcará a semana política galega, coa oposición reclamando unha condena explícita ao “xenocidio” no pleno que arrinca o martes. O BNG levará unha proposición non de lei para instar aos grupos a posicionarse, despois de fracasar nun intento previo de declaración institucional. O PSdeG, pola súa banda, pedirá gardar un minuto de silencio e prepara a súa propia iniciativa. Os populares, que rexeitan empregar ese termo, cualifican de “repugnante” que se utilice o masacre con fins partidistas.

Ademais da crise internacional, o Parlamento galego abordará a vaga de incendios do verán. O BNG reclamará crear unha comisión de investigación para analizar a xestión, proposta que conta co apoio do PSdeG, aínda que este último ve máis operativo reforzar o seguimento do ditame da comisión de 2017. O PPdeG, pola contra, rexeita a iniciativa, acusando á oposición de buscar un “xuízo político” ao presidente Rueda tras pedir a súa dimisión.

O pleno tamén centrará parte do debate en servizos públicos. O presidente responderá sobre as prioridades de acción política e sobre as medidas para reforzar a seguridade das traballadoras do Servizo de Axuda no Fogar (SAF), tras o crime do Porriño. Neste bloque, o BNG cuestionará ao conselleiro de Educación polo inicio do curso e denunciará a “falta de recursos” no ensino, ademais de presentar unha interpelación sobre a atención sanitaria en primaria e urxencias.

Tamén haberá iniciativas sobre menores migrantes non acompañados. O PSdeG pedirá máis responsabilidade e recursos da Xunta para garantir a súa protección e integración, mentres que o PPdeG reclamará ao Goberno central financiamento suficiente e que abandone a súa “política de imposición” na repartición. Os populares levarán, ademais, unha proposta para un plan estratéxico dos aeroportos galegos tras o anuncio de recortes de Ryanair, e formularán preguntas sobre o caos ferroviario nos incendios de agosto e proxectos pendentes en sanidade e transición ecolóxica.

Por último, o hemiciclo tratará a reforma da lei galega do deporte, vixente desde 2012. A modificación busca adaptala ás novas necesidades sociais e permitirá que a Administración autonómica poida exercer como acusación popular en procedementos relacionados con delitos ou actos de violencia no ámbito deportivo.