Sen minuto de silencio por Gaza no Parlamento: o PPdeG négase a falar de "xenocidio"

O conflito de Gaza marcou a primeira sesión do pleno desta semana no Parlamento de Galicia, aínda que, ao contrario do que sucedeu no Congreso dos Deputados, non se chegou a acordar un minuto de silencio en solidariedade coas vítimas. O escollo principal foi o termo “xenocidio”, que o PPdeG, que presentou unha contraproposta evitando esa definición, non estaba disposto a aceptar.

A Mesa do Parlamento, presidida por Miguel Santalices, reuniuse tras a sesión para abordar o asunto. Ademais do escrito presentado polo PSdeG, que condenaba expresamente o xenocidio, tamén se debateu outro rexistrado polo PPdeG, solicitando un minuto de silencio “en sinal de solidariedade e respecto cos inocentes civís palestinos e israelís” afectados polo conflito.

PSdeG, BNG e o deputado de Democracia Ourensá expresaron o seu apoio á proposta socialista, mentres que o PP criticou as formas de presentación do escrito socialista e a súa “utilización espuria” do conflito. A discrepancia entre grupos imposibilitou chegar a un consenso, e a Mesa remitiu a decisión ao diálogo entre portavoces sen que se concretase ningunha resolución.

A oposición denunciou que o PPdeG, con Alfonso Rueda á fronte, “está instalado no negacionismo do xenocidio de Gaza” e recordou que no pasado pleno impediu unha declaración institucional, agora vetando tamén o minuto de silencio nos termos que propuxo o PSdeG. O BNG defenderá unha proposición de lei para fixar unha condena unánime ao xenocidio, mentres que o PSdeG prepara máis iniciativas nesta liña.

Fontes socialistas subliñaron que non van aceptar ningunha proposta que aluda a unha suposta “guerra de bandos”, mentres que o PPdeG mantén a súa contraproposta sen aclarar se reformulará a súa postura nas próximas sesións. Así, a previsión é que, salvo cambio de última hora, non se celebre ningún minuto de silencio na Cámara galega, a diferenza do Congreso dos Deputados.