Pontón explora vías de colaboración con China para impulsar ás empresas galegas

Durante a cita, Pontón subliñou a necesidade de corrixir o déficit na balanza comercial galega con China, ao tempo que trasladou o interese de Galicia por atraer investimentos sostibles e innovadores que xeren riqueza e emprego. Segundo explicou, o tecido económico galego é competitivo e referente en moitos ámbitos, polo que a colaboración con China pode contribuír a diversificar e fortalecer a economía galega.

A dirixente do BNG tamén puxo o acento na relevancia de reforzar as relacións bilaterais no eido académico e cultural, promovendo os intercambios universitarios e a difusión da lingua e da cultura galega no país asiático. Defendeu que o intercambio cultural é unha das mellores vías para construír relacións de igualdade, amizade e integración, ao tempo que lembrou a convivencia enriquecedora xa existente coa comunidade chinesa asentada en Galicia.

Finalmente, Pontón aproveitou a reunión para trasladar o compromiso do BNG cos principios de soberanía dos pobos, xustiza e paz, apostando por unhas relacións internacionais baseadas na igualdade. Nunha mensaxe política máis ampla, avanzou que a súa formación seguirá defendendo os intereses de Galicia en todas as negociacións, incluída a relativa aos futuros Orzamentos Xerais do Estado.