Premian o modelo de educación híbrida de Galicia
Recibe o primeiro premio do Obervatorio Nacional de Educación Dixital.
Por E.P. | SANTIAGO DE COMPOSTELA | 30/09/2025 | Actualizada ás 17:49
O modelo de educación híbrida de Galicia foi recoñecido a nivel estatal coa primeira edición do premio que outorga o Observatorio Nacional de Educación Dixital (ONED), un consorcio integrado por entidades tanto públicas como privadas vinculadas á investigación como á Fundación Cotec e a Fundación Princesa de Xirona, entre outras.
Segundo sinalan nun comunicado, o conselleiro de Educación, Ciencia, Universidades e FP, Román Rodríguez, recolleu este martes en Málaga este galardón, nun acto que tivo lugar con motivo das xornadas de colaboración público-privada en educación organizadas por esta organización, cuxa labor se centra en xerar coñecemento colectivo e ofrecer información actualizada sobre a educación dixital en España.
Destacan que a aposta da Xunta pola educación híbrida, "que este curso se afianzou coa actualización do proxecto E-dixgal", así como o impulso da futura Lei de ensino dixital, son dúas dos elementos distintivos deste modelo. Segundo o conselleiro, "supón un aval ao continuo labor realizado nos últimos anos grazas a un diálogo permanente con todos os axentes que integran a comunidade educativa".
Na súa intervención no acto, remarcou a necesidade de abordar os retos tecnolóxicos "con sentido común" para sacarlle "o máximo rendemento" ás competencias dixitais desde unha perspectiva didáctica e "sempre pondo ao alumno no centro das decisións". Así mesmo, puxo o foco na futura Lei de Educación Dixital, que regulará os dereitos e deberes dos membros da comunidade educativa ante novos desafíos como a intelixencia artificial.
