Besteiro defende un modelo de escolas sustentables para abordar a loita contra o cambio climático

O secretario xeral do PSdeG, José Ramón Gómez Besteiro, reclamou desde Barcelona un modelo de centros educativos sustentables para Galicia. "O programa socialista de escolas sustentables demostra que é posible abordar desde os colexios a loita contra o cambio climático cunha visión integral: alimentación, enerxía, residuos e espazos, tamén coa transformación dos patios", proclamou.

Así, o líder socialista apostou por actuar desde o ámbito educativo "promovendo desde a infancia valores sustentables. Con motivo da súa viaxe á capital catalá, Besteiro visitou este xoves unha gardaría integrada no programa municipal 'Escoles+Sustentables', un modelo que, segundo destacou o PSdeG nunha nota de prensa, contribúe á loita contra o cambio climático e que quere que a Xunta aplique en Galicia.

Por iso, avanzou que o Grupo Socialista no Parlamento galego vai presentar proximamente unha iniciativa a través da que lle esixe ao Goberno autonómico a creación de programas educativos integrais contra o cambio climático. Nesta liña, criticou que a Xunta "segue sen cumprir o acordo parlamentario para incluír nos contratos de comedores escolares e residencias de maiores o emprego de produtos locais", unha medida aprobada pola Cámara a proposta do PSdeG.

O secretario xeral do PSdeG, José Ramón Gómez Besteiro, visita unha gardaría en Barcelona | Fonte: PSDEG