Case 3.000 aves foron atendidas nos Centros de Recuperación de Fauna Silvestre de Galicia
Case mil xa foron devoltas ao seu medio natural.
Por Europa Press / Redacción | SANTIAGO DE COMPOSTELA | 04/10/2025 | Actualizada ás 17:25
A rede de Centros de Recuperación de Fauna silvestre de Galicia, dependente da Consellería de Medio Ambiente e Cambio Climático, atenderon máis de 2.900 exemplares de aves no que vai de ano. Segundo informou a Xunta nun comunicado, as catro instalacións dedicadas ao coidado e atención de animais axudaron xa a preto do 46% das aves asistidas na comunidade.
A conselleira de Medio Ambiente e Cambio Climático, Ángeles Vázquez, visitou este sábado o Centro de Recuperación de Fauna de Carballedo. Ademais, con motivo do Día das Aves 2025, un grupo de estudantes de centros educativos do municipio presenciaron a solta de tres exemplares.
A conselleira indicou que a liberación destes paxaros demostra "o compromiso coa protección" da biodiversidade e co traballo constante dos centros especializados na recuperación de especies. Entre xaneiro e setembro, ingresaron no catro centros galegos de recuperación de fauna 2.914 exemplares de aves, das cales 986 foron devoltos ao seu medio natural, e 347 atópanse en proceso de recuperación, o que representa aproximadamente o 45,7% do total.
Actualmente, do total de aves que permanecen en proceso de recuperación nos diferentes centros, a maioría están no de Santa Cruz de Oleiros (A Coruña), cun total de 202 aves; seguido do de Carballedo-Cotobade (Pontevedra), con 121, e os centros de O Veral (Lugo) e do Alto do Rodicio (Ourense), que albergan 12 aves cada un.
