Cumio do PPdeG cos seus alcaldes de menos de 5.000 habitantes: "Pedimos máis recursos ao Goberno central"

Begonte acolleu unha reunión da Comisión de Pequenos Municipios do PPdeG, presidida pola secretaria xeral do partido, Paula Prado, xunto ao alcalde local, José Ulla, e o coordinador do órgano, José Ángel Santos. No encontro, os populares reivindicaron a necesidade de reforzar os servizos e recursos básicos no medio rural, fronte ao que cualificaron como a "falta de sensibilidade" do Goberno central cara a Galicia.

Paula Prado criticou duramente ao PSOE e ao BNG por apoiar no Congreso a Lei de Mobilidade Sustentable, "unha norma que, segundo denunciou, deixará sen parada de autobús estatal a 22 municipios galegos e a máis de 130.000 veciños". "É un novo agravio de Sánchez a Galicia e unha mostra do desprezo do Goberno central cara ao rural", afirmou.

Prado destacou que o PPdeG goberna actualmente en case o 60% dos municipios galegos de menos de 5.000 habitantes, e traballa para ampliar a súa representación nas eleccións municipais de 2027. "O noso compromiso co rural é firme: cada galego, viva onde viva, debe ter acceso aos servizos fundamentais", subliñou.

"COMPARTIR EXPERIENCIAS E SOLUCIÓNS"

O alcalde de Begonte, José Ulla, agradeceu a elección do seu municipio para celebrar a reunión, destacando a importancia de "compartir experiencias e solucións". Puxo como exemplo a xestión local do abastecemento e saneamento de auga, que garante o servizo a todos os núcleos de poboación, dous polígonos industriais e as explotacións gandeiras do municipio.

Ulla tamén destacou o mercado local de enerxía, unha iniciativa que permite a Begonte producir a súa propia enerxía, reducindo o custo eléctrico tanto para o concello como para os veciños. "É unha mostra de que os pequenos municipios tamén podemos ser innovadores e sustentables", concluíu.

DEPENDENCIA

O PPdeG tamén acusou ao PSdeG de "alarmar" e emprazou á formación liderada por José Ramón Gómez Besteiro a "centrar os esforzos" en presionar ao Goberno de Pedro Sánchez para que "abone os máis de 2.500 millóns de euros" que, segundo sinalan, "debe a Galicia pola dependencia".

Así o sinalou nun comunicado remitido aos medios a portavoz de Política Social do Grupo Popular, Raquel Arias, despois de que este xoves a deputada socialista Silvia Longueira, acusase á Xunta de levar a Galicia "á cola" da dependencia por "falta de vontade política".