O Comité Intercentros da CRTVG denuncia o uso "perverso" que o PPdeG fai do ente público
Os populares non acudiron a unha xuntanza convocada co Comité para abordar a creación do Estatuto Profesional e o Consello de Informativos e a entrega de 359 sinaturas apoiando a súa constitución.
Por Galicia Confidencial | Compostela | 04/07/2016 | Actualizada ás 13:55
O Comité Intercentros da CRTVG denuncia que o PPdeG está a empregar este órgano público "ao servicio partidista" desta formación e que segue a liña ditada polo director xeral de suspensión de diálogo coa parte sindical, despois da protesta na redacción contra a manipulación informativa que se fixo no caso das escoitas do ministro de Interior en funcións, a pasada semana, que non se emitiron na cadea pública.
Nun comunicado, critican que os catro conselleiros nomeados polo PP non Consello de Administración da CRTVG non se presentaron a xuntanza convocada este luns cos representantes do persoal, sen que se desconvocara formalmente a xuntanza, que tiña como obxectivo propoñer a posta en marcha do Estatuto Profesional e o Consello de Informativos.
Dende o Comité Intercentros valoran este desprezo como "unha falta moi grave a representación sindical, aos das traballadoras e traballadores da corporación e o mesmo órgano". Precisamente no mesmo acto tamén se entregaron 359 sinaturas dos traballadores e traballadoras da CRTVG reclamándolle ao Consello de Administración que poña en marcha o procedemento de creación do Estatuto e o Consello.
Os que si acudiron a xuntanza foron os dous conselleiros propostos polo PSdeG, que recolleron as reivindicacións dos representantes sindicais. Aseguraron que van a propoñer, unha vez máis, o cumprimento da lei, levando ao pleno do Consello de Administración, para que se axilicen ao máximo os prazos.
Dende o Comité Intercentros din que detrás desta ausencia hai un obxectivo; "atrasar ao máximo a creación dun órgano como pode ser o Consello de Informativos, que cuestione o traballo de xeito profesional as protestas contra a manipulación das que agora se canalizan a través do Comité e do blog eunonmanipulo".
