Accionistas minoritarios de Pescanova insisten en que foron “estafados” e piden “xustiza”
Denuncian que o convenio de acredores da empresa galega foi "unha estafa" e que foron enganados para que se aprobase.
Por E.P. | Vigo | 25/07/2016 | Actualizada ás 11:49
Os accionistas minoritarios de Pescanova denunciaron que o convenio de acredores da empresa galega foi "unha estafa" e que foron enganados para que se aprobase, segundo sinalaron nun comunicado.
En concreto, o accionista minoritario Lorenzo Ramet denunciou que, mesmo antes de que se aprobase o convenio, a antiga cúpula da empresa non dicía "toda a verdade" do que se recollía no convenio, que "todo era un engano co único propósito para que se aprobase".
Ramet subliñou que se lles ocultou a verdade, que a aprobación do convenio deixaría á antiga Pescanova sen negocio, sen patrimonio, sen traballadores, "sen nada", e que todo pasaría á Nova Pescanova, levando aos minoritarios a perdelo todo e sen posibilidade de volver a Bolsa.
Desta forma, os minoritarios esixen que se "faga pública toda a verdade do calvario" que está a pasar os 9.000 accionistas que "foron enganados por partida dobre" e que se "faga xustiza", polo que piden tanto á Comisión Nacional do Mercado de Valores (CNMV) como á xustiza que actúen de oficio anulando o convenio ou buscando unha saída digna ás familias que están atrapadas en Pescanova.
