TURISMO.- A busca de novas experiencias e "gozar da paisaxe", motivación para realizar o Camiño

Os peregrinos que chegaron a Compostela no día da celebración do Apóstolo aseguran que a motivación para facer o Camiño nestas datas foi a busca de novas experiencias e "gozar da paisaxe", pero en varios casos consultados, ningún fixo coincidir a propósito a súa chegada ante a Catedral compostelana co Día do Apóstolo.

Así o asegurou a Europa Press unha familia valenciana que chegou a Santiago dende Sarria este domingo. "Sabiamos que era o día do Apóstolo, pero escollémolo por casualidade", sinalaron. A decisión de facer o Camiño tomárona durante a celebración das Fallas valencianas. "Ao chegar aquí atopámonos con máis fogos", bromearon.

Pola súa parte, Cristina e Patricia son dúas mozas cataláns que decidiron filmar a súa experiencia camiñando dende Sarria durante cinco días. Cristina está a facer o seu proxecto final de Bacharelato quixo recolectar as historias do Camiño Francés.

Realizouno coa axuda da súa irmá pequena, de 14 anos, e as dúas resaltaron a seguridade do Camiño "a pesar de ser menores". "Tan só nun albergue tivemos problemas para durmir porque non nos deixaban quedar a dúas menores soas", puntualizaron. Non obstante, grazas á axuda de máis peregrinos, conseguiron solucionar "tódolos obstáculos", polo que destacaron que "os amigos do Camiño son, sen dúbida, a mellor parte".

APÓSTOLO MULTITUDINARIO

Durante a semana previa ao 25 de xullo, Santiago recibiu un total de 8.235 peregrinos, un dato que supera ao mesmo período do ano anterior, cando chegaron á cidade 7.735 persoas, e ao do último Ano Santo (2010), que contabilizou 8.080 visitas.

Segundo sinalou a Oficina do Peregrino a Europa Press, na xornada do sábado 23 chegaron 1.833 peregrinos, fronte aos 1.725 rexistrados en 2015 e os 2.352 que o fixeron no mesmo día de 2010.

Pola súa banda, os peregrinos lamentaron que durante a mañá deste luns non puideron chegar camiñando coas súas mochilas ás inmediacións da praza do Obradoiro, debido ao equipo de seguridade despregado con motivo da ofrenda ao Apóstolo Santiago.