Un cento de persoas paga a denuncia en Bruxelas contra a privatización do Hospital de Vigo
A Asociación Galega en Defensa da Sanidade Pública estima que en setembro haberá fallo da Xustiza Europea.
Por Galicia Confidencial | Vigo | 18/08/2016 | Actualizada ás 10:28
Un total de 111 persoas e colectivos aportaron diñeiro do seu peto para financiar a denuncia da Asociación Galega en Defensa da Sanidade Pública en Bruxelas contra a privatización do Hospital Álvaro Cunqueiro.
A Comisión Europea xa admitiu a trámite a denuncia contra a concesión de obra pública tipo PFI (Iniciativa de Financiación Privada) levada a cabo polo goberno do PP da Xunta de Galicia. O novo modelo de xestión do hospital provocou algunha das maiores manifestacións que se recordan en Vigo.
A citada Asociación explica que tiveron que asumir facturas de letrados por un importe de 6.300 €, dos que faltan por abonar 4.100 €. Por iso montaron esta iniciativo de micromecenazgo, que tardou pouco máis dun mes en conquerir o diñeiro necesario.
A Asociación Galega para a Defensa da Sanidade Pública
indica tamén que ao longo do mes de setembro prevé que os tribunais europeos ditaminen sobre a reclamación. Na súa opinión, un fallo favorable, acercaría un posible rescate do Hospital Álvaro Cunqueiro e tamén dos demais centros sanitarios.
