Por X.M. Fernández | Monforte | 18/08/2016 | Actualizada ás 18:35
A rúa Cardeal de Monforte acolle dende este venres, 19 de agosto, e ata o domingo, día 21, a primeira edición da Feira Ágora Verde de Produtos Ecolóxicos Certificados de Galicia. O Concello organiza este evento en colaboración co Consello Regulador de Agricultura Ecolóxica de Galicia (CRAEGA) e coa Deputación Provincial de Lugo.
“Queremos apostar, apoiar e dinamizar a actividade dos emprendedores no ámbito da agricultura ecolóxica. Por ese motivo, coa celebración de feiras coma esta damos un paso para poder conseguilo, ademais o evento servirá para potenciar un consumo saudable entre a poboación”, explicou o Alcalde, José Tomé Roca. O mandatario local engadiu tamén durante a presentación que “o que se pretende con esta feira é sacar á rúa e poñer en contacto a operadores, empresas e cidadáns, ó tempo que concienciar de hábitos e consumos saudables”.
Durante a presentación, o rexedor estivo acompañado da deputada provincial de Medio Ambiente, Sonsoles López Izquierdo, que fixo fincapé en que “actividades coma esta son moi positivas para poder loitar contra o despoboamento que está vivindo o medio rural”.
Estímase que na Feira Ágora Verde daranse cita un total de 20 produtores ecolóxicos, boa parte deles da comarca de Lemos. Os expositores serán moi variados, dende carnes e mel, ata castañas, fariñas e queixos. A inauguración oficial do evento será este venres, 19 de agosto, ás 18 horas. Así e todo, os postos estarán abertos dende as 11 horas durante as tres xornadas. Os organizadores non teñen prevista unha hora de peche posto que dependerá da afluencia de público.
Obradoiros e degustacións
Está previsto que durante a feira haxa obradoiros para nenos, entre outras actividades, os máis pequenos van poder facer xogos tradicionais e debuxos. Doutra banda, o público que se achegue á Feira Ágora Verde poderá gozar de degustacións que serán de balde. Será posible probar licores galegos e cócteles variados.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.