En Marea quere “devolver á cidadanía” os medios públicos cunha reforma da CRTVG

En Marea conta no seu programa electoral cunha "profunda reforma" da Compañía de Radio Televisión de Galicia (CRTVG) para "devolver os medios públicos" á cidadanía. Así o anunciou hoxe o seu candidato á Presidencia da Xunta, Luís Villares, quen avanzou que proporán unha reformulación do ente público galego, a través dunha "profunda reforma" do Consello de Administración da CRTVG que, na súa opinión, foi convertido "polos partidos tradicionais nun balneario para vacas sagradas"

Luís Villares | Fonte: Europa Press.

Así, Villares pola racionalización de salarios dos membros do consello, o fomento da "transparencia no seu funcionamento" e a incorporación a este de traballadores da propia CRTVG, de "profesionais de relevancia no sector" e "representantes da sociedade civil". Ademais, puxo sobre a mesa a creación dun "estatuto profesional dos traballadores", así como a "dun consello de informativos" que "impida calquera indicio de manipulación informativa e asegure a participación dos traballadores na política editorial".

"Comunicar e recibir información veraz é un dereito fundamental. Para iso están os medios públicos en Galicia, non para que Feijóo devolva favores aos seus amigos e para aforrar diñeiro ao PP pagando unha e outra vez con diñeiro público a súa propia campaña electoral", arguíu Villares.

"DÉBEDA DOBRE"

Para o candidato de En Marea, estas iniciativas pretenden saldar unha "débeda dobre", primeiro "coa cidadanía no seu conxunto", para que os galegos se sintan "representados na súa diversidade" nos medios de comunicación públicos e, segundo, cos "traballadores do sector" para "garantir os seus dereitos".

Así mesmo, tamén avanzou que a súa formación tratará de "impulsar a reforma da Lei de Medios Audiovisuais de Galicia" para facela "máis democrática", así como garantir o seu cumprimento no "que se refire aos medios de comunicación comunitarios", como as emisoras municipais.

DEBATES E USO DO GALEGO

Por outro lado, Villares anunciou que, de converterse en Presidente da Xunta tras as eleccións do 25 de setembro, someterase "periodicamente ás preguntas de xornalistas escollidos polo consello de informativos" da CRTVG. "Feijóo será o último inquilino escapista de Monte Pío", apostilou.

Villares criticou, ademais, o modelo de "debate a cinco" proposto pola CRTVG que se celebrará —a falta de confirmación oficial— o próximo 12 de setembro, xa que acusa a Feijóo de "non concretar" as regras do debate nin "garantir a igualdade de condicións para as distintas forzas políticas".

"Para nós os debates non dependerán dos intereses particulares dun goberno, se non que serán obrigatorios no seu formato e as súas regras de xogo a criterios obxectivos, democráticos e transparentes", apuntou.

Ademais, sinalou a necesidade de "desenvolver plans transversais" dende a Xunta para o fomento do uso do galego nos medios, xa que é unha lingua "claramente discriminada no ámbito mediático".

Así, avanzou o reforzo da "normalización lingüística en todos os concursos públicos relacionados coa comunicación" e o impulso do galego "incentivando o tecido informativo local, xa sexa a través da existente rede de emisoras municipais" ou "favorecendo a creación de servizos de comunicación comunitarios".

EDUCACIÓN

"Os medios son unha ferramenta de escrutinio público fundamental que perden o seu sentido se a cidadanía carece das competencias necesarias para o seu correcto uso", comentou Villares, para o que é preciso desenvolver un plan para a 'alfabetización mediática' dos galegos, xa que "sen unha sociedade formada e informada é extremadamente difícil a consolidación de boas prácticas democráticas".

En concreto, En Marea propón a creación dun "foro galego de educación, comunicación e cidadanía" ou o desenvolvemento por parte da Consellería de Educación dun "plan de educación mediática para a súa implementación en todos os ámbitos formativos".