Por Galicia Confidencial | Compostela | 02/09/2016 | Actualizada ás 16:00
O Grupo Naturalista Hábitat, a Asociación para a Defensa Ecolóxica de Galiza (ADEGA), a Sociedade Galega de Ornitoloxía (SGO) e a Sociedade Galega de Historia Natural (SGHN) denuncian o impacto ambiental ocasionado pola “Vuelta Ciclista a España”, concretamente pola destrución de hábitats protexidos e o lixo esparexido na contorna da Vixía Herbeira (Cariño).
En novembro de 2015, a Deputación Provincial da Coruña asinou un convenio con Unipublic, organizador da “Vuelta Ciclista a España”, no que se establecía que unha das etapas finalizaría na Vixía Herbeira. Por iso, a finais de xullo de 2016 comezaron as obras de creación dun aparcamento a carón da estrada CP-2205 na Vixía Herbeira, na zona da chegada da etapa prevista para o 23 de agosto dese ano.
Estas entidades lembran que a primeira intervención foi un desmonte en terreos parcialmente incluídos nun espazo protexido: o Lugar de Importancia Comunitaria ES1110002 “Costa Ártabra” (FOTO 1). “Seguidamente procedeuse a encher a área desmontada con grandes pedras, e antes do 14 de agosto de 2016 a zona desmontada asfaltouse totalmente, e comezou a usarse como aparcadoiro de vehículos”, critican.
“Non temos constancia de que esta obra contase con calquera tipo de estudo ambiental, necesario tanto pola súa extensión como por afectar a un espazo natural protexido; nin tan sequera coa pertinente autorización do Servizo de Conservación da Natureza da Consellería de Medio Ambiente e Ordenación do Territorio da Xunta de Galicia, polo que se podería cualificar de presuntamente ilegal”, engaden nun comunicado.
Impacto ecolóxico
A zona afectada polas obras inclúe hábitats de interese comunitario considerados prioritarios que se atopaban dentro do propio espazo protexido, como o 4020 “Urceiras húmidas atlánticas de zonas temperadas de Erica ciliaris e Erica tetralix” e o 4030 “Urceiras secas europeas”.
Ademais, tras a chegada da etapa da “Vuelta Ciclista a España” á Vixía Herbeira o 23 de agosto de 2016, denuncian a presenza dunha cantidade considerable de lixo (sobre todo plásticos) “botado sen control polos arredores da zona da chegada”, afectando a terreos dentro do espazo protexido.
Por iso, Grupo Naturalista Hábitat, a Asociación para a Defensa Ecolóxica de Galiza (ADEGA), a Sociedade Galega de Ornitoloxía (SGO) e a Sociedade Galega de Historia Natural (SGHN) solicitan que se investiguen a fondo estes feitos, para aclarar o papel xogado pola Deputación Provincial da Coruña, así como polo Concello de Cariño, nesta obra presuntamente ilegal dentro dun espazo protexido.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.