Por Xurxo Salgado | Compostela | 15/09/2016 | Actualizada ás 14:01
“A partir de agora, calquera cidadán que acuda á Xunta e se exprese en castelán poderá ser respondido polo funcionario que o atenda en castelán". Así de contundente foi este xoves o anuncio realizado polo presidente da Xunta en funcións, Alberto Núñez Feijóo, sobre os dereitos lingüísticos dos usuarios que acudan á Administración galega.
Este “novo” dereito dos cidadáns será “blindado”, segundo Feijóo, no novo Decreto de Protección Cidadá, tal e como confirmou na rolda de prensa posterior ao Consello da Xunta. “Ata hoxe a todos os cidadáns que a acudían ás nosas dependencias administrativas se lles contestaba en galego, independentemente de se utilizaban esta lingua ou o castelán. Agora iso vai cambiar”, destacaba.
Un anuncio que chega a dez días dos comicios autonómicos e que entronca cunha das esixencias expresadas por Ciudadanos, o partido que pesca no caladoiro de votos do Partido Popular. Precisamente, a súa candidata, Cristina Losada, exprésase habitualmente en castelán, e así o fixo no debate a cinco que tivo lugar o pasado luns na CRTVG.
Preguntado por GC como se equiparará ese dereito, se se lle preguntará ao usuario en que idioma quere que se lle responda, Feijóo dubidou. Primeiro dixo que sería contestado na lingua que utilizara, aínda que despois matizou que, “agás que indique o contrario, será respondido en galego”.
Este novo decreto tamén recolle a creación dunha Oficina de persoas usuarias para que a opinión dos cidadáns “tamén se teña en conta”. “Non só se trata de recibir queixas, senón tamén de contestalas”, matizou Feijóo. Asemade, lembrou que os galegos dispoñen xa dun Portal da Transparencia que, ademais, dixo, publicará informes anuais e destacou que se incorporará o potal electrónico da Xunta ás queixas.
Este anuncio de Feijóo coincide, ademais, cunha nova queixa por parte da asociación Galicia Bilingüe que ten denunciado a un centro educativo por espoñer na web e no propio centro o cartel gañador da pasada edición do Día das Letras Galegas. Este cartel reza: "Fala galego, non sexas lelo".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.