Por Galicia Confidencial | Lugo | 14/10/2016 | Actualizada ás 12:16
Modernización das vías para reducir o traxecto entre Lugo e Madrid nunha hora. En total, 650 millóns de euros, moito menos da metade do que custaría unha liña de alta velocidade e case no mesmo tempo. Esa é a proposta dun informe encargado polo Eixo Atlántico para a conexión ferroviaria destra provincia coa meseta.
"O Informe sobre o ferrocarril na provincia de Lugo", do catedrático da Universidade da Coruña Miguel Rodríguez Bugarín, presentouse este xoves en Monforte coa presenza do secretario xeral do Eixo Atlántico, o presidente da deputación e os rexedores de Lugo e Monforte. Unha das súas principais conclusións é que acortaría nunha hora, ata as 3 horas e media, o actual trazado Lugo-Madrid e o situaría "en tempos de viaxe similares a Vigo ou A Coruña".
Para iso, aposta na liña Lugo-Ourense pola construción de tres novas variantes ferroviarias en lugares onde na actualidade a velocidade é moi lenta debido á orografía do terreo ou ao seu paso por núcleos urbanos. Precisamente, estes puntos están localizados en Rubián, entre Monforte e Canaval e nos Peares.
A variante de Canaval é unha das máis polémicas e leva desde os anos oitenta enriba da mesa. Suporía, afastar as vías do centro urbano de Monforte e serían eliminados todos os pasos a nivel que actualmente existen na localidade. Ese novo trazado traería aparellado, tamén, a construcción dunha nova vía entre a estación e o porto seco.
650 millóns
"É moi difícil xustificar investimentos como as que se calcularon para construír unha liña de alta velocidade cando a poboación potencialmente afectada é relativamente baixa e, en consecuencia, a avaliación socioeconómica da actuación non proporciona valores que xustifiquen levala a cabo", recolle o estudo para descartar, precisamente, a alta velocidade que é moi custosa.
O estudo tamén destaca que a solución proposta favorecería "a prestación de servizos de media distancia máis competitivos que os que se prestan actualmente". O custo económico desta inversión sería de 650 millóns que se repartirían en cinco anualidades, pouco máis de 120 millóns por ano.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.