Os veciños que prefiren ter o tráfico por medio da vila
Ten sentido facer outra estrada cando xa hai unha autopista e unha nacional que circulan na mesma dirección separadas por pouquísimos quilómetros? A Plataforma Veciñal Variante Non alerta ademais do impacto na Rede Natura.
Por Galicia Confidencial | Pontecesures | 26/10/2016 | Actualizada ás 13:07
En Galicia é común que as estradas nacionais atravesen o centro das vilas. De feito, moitas localidades medraron no último século ao carón desas estradas. Co aumento do tráfico, a reivindicación de variantes que humanicen os centros levando os coches por fóra do centro é moi frecuente no país.
Non sucede así en Valga e Pontecesures. Aló, unha parte significativa da veciñanza forma parte Plataforma Veciñal Variante Non, contraria a desdobrar a Nacional 550.
O tráfico nesta vía disparouse pola crise. Moitos condutores que antes montaban alegremente na AP9 agora aforran a peaxe indo pola nacional. O Estado reaccionou acelerando o previsto desdobramento nese tramo. Este 19 de outubro o Ministerio de Fomento publicou o Estudio de Impacto Ambiental.
Dende a Plataforma pregúntanse que sentido ten tres estradas paralelas (a autoestrada AP9, a actual nacional e a nova variante) en poucos quilómetros? Negan, en contra do que di o alcalde de Valga, que as colas sexan continúas.
Ademais alertan que “a nova alternativa presentada mantén as afeccións a espazos medioambientais incluídos na Rede Natura 2000 (Sistema fluvial Ullla-Deza), modificación e alteración da traza histórica do Camiño Portugués a Santiago e a perda de terreos forestais e agrícolas”.
Engaden de paso que a variante da vila veciña, Padrón, é un “fracaso absoluto” porque o centro segue a soportar bastante tráfico.
Os seus argumentos son tamén de tipo económico. “Coa construción desta nova variante, os negocios de Pontecesures e Valga sufrirán unha perda económica significativa, o que levará á morte destes núcleos urbanos; o que ocasionaría un enorme prexuízo económico e social nestes concellos”, explican.
O seguinte paso na súa protesta, ademais de volver alegar contra o estudio informativo, será contactar cos deputados galegos no Congreso e, lóxicamente, no Parlamento de Galicia, para que se retraten ante a inflación de estradas na zona. Na opinión dos veciños, todas as alternativas de variante presentadas por Fomento son innecesarias.
