Galicia rexistra un 1,19% das reservas rurais para a ponte de decembro, segundo clubrural

As reservas de turismo rural caeron un 70,29 por cento na ponte de decembro respecto a 2015, segundo datos do portal de aloxamentos clubrural que asegura que os datos deste ano non permitiron alcanzar as cifras de anos anteriores cando as festividades caían en luns ou venres. En Galicia as reservas para esta ponte festiva sitúanse no 1,19 por cento.

Aínda que en 2015 as festas foron en domingo e martes, moitas comunidades trasladaron o Día da Constitución ao luns 7 de decembro, podendo gozar de máis xornadas non laborables.

Non en tanto, en 2016 non existe posibilidade de ter máis días festivos que non impliquen tomarse vacacións no traballo, o que supuxo, segundo o portal de aloxamentos rurais que as reservas descenderan en picado.

O 20,08% das reservas xestionáronse en casas rurais de Castilla e León, seguidas polas de Cataluña (16,70%), Andalucía (14,18%), Comunidade de Madrid (9,88%) e Aragón (8,78%).

No lado oposto sitúanse Baleares (0,27%), País Vasco (0,96%), Canarias (1,01%), La Rioja (1,05%) e Galicia (1,19%), como as rexións con menos visitas na ponte da Inmaculada.

Por provincias, destacar a primacía de Madrid (9,88%), Barcelona (8,23%), Ávila (5,72%), Huesca (5,26%), Girona (4,99%), Asturias (4,99%), Segovia (4,30%), Soria (3,61%), Granada (3,16%) e Teruel (2,88%).

Estas provincias confirman os seus bos datos tendo entre as súas localidades, os pobos máis visitados para estas datas. Cangas de Onís (Asturias), Robledo de Chavela, El Berrueco, Valdemanco e Aranjuez (Madrid), Santa Eulalia de Ronçana e Dosrius (Barcelona), Navaluenga (Ávila) Aracena (Huelva) e Caravaca de la Cruz (Murcia) son os máis demandados para a ponte de decembro.