La Voz inicia unha reestruturación da súa división audiovisual
Pecha o seu programa máis exitoso, Vía V, que dirixía a directora da canle, Fernanda Tabarés, e que destacaba polo seu gran pluralismo político O grupo suliña que a decisión débese a que se pretenden impulsar os contidos dixitais.
Por Xurxo Salgado | A Coruña | 01/12/2016 | Actualizada ás 14:31
O Grupo Voz acaba de iniciar unha reestruturación da súa división audiovisual que tivo como primeiro chanzo a supresión do programa Vía V, que dirixía a directora da canle, Fernanda Tabarés, e que era o programa máis visto da canle desde que comezou, en 2010.
“Día triste hoy. Se cierra la ventana del VíaV. Gracias por 1128 noches de periodismo y emoción📝💜. Nuestro compromiso sigue intacto. #FinVíaV”. Era o que escribía, precisamente, Tabarés nas súas redes sociais sobre o peche do seu espazo que chegou a ter cotas de pantalla de case o 3%. Unhas cifras escasas pero moi superiores ao 0,3% de media que tiña toda a canle.
O peche deste programa responde, segundo a dirección do grupo, a unha reestruturación da programación e tamén da propia V Televisión. Fontes do Grupo Voz destacaron a GC que o obxectivo agora e crear unha “gran plataforma dixital” na que teñan “máis e mellor encaixe” os contidos da división audiovisual da canle. Unha decisión que tamén afectará a outras patas do grupo, como Radio Voz. “Trátase de mantelo todo pero con contidos máis propios para utilizar no mundo dixital”, indicaron.
Sobre o peche do programa indicaron que xa levaba “moito tempo no aire” --esta era a súa 7ª tempada-- e “todo ten un límite”. Ademais, suliñaron que a realización deste programa “consumíalle moito tempo” a súa presentadora, Fernanda Tabarés, que é a directora da canle. “Ela ten que dirixir a TV e iso quitáballe tempo”, suliñaron estas fontes da dirección.
Outras fontes consultadas e colaboradores habituais do espazo de Fernanda Tabarés vinculan o peche deste programa a cuestións políticas. “A Feijóo non lle gustaba ter un programa con tanta pluralidade como este”, suliñan. Tamén vinculan a decisión co “enfriamento das relacións” entre a directora da canle e o presidente do grupo. De feito, a xornalista xa non publica desde hai algún tempo a súa habitual columna dos domingos na contracapa do medio.
Un medio que xera “grandes perdas”
Segundo puido saber GC existe un escrito remitido á dirección do grupo que apunta á necesidade de cambiar radicalmente, precisamente, a división audiovisual do grupo Voz e, concretamente, a súa televisión polas “enormes perdas” que lle xera. Así, recomendaba ou o peche da canle, ou a súa total reestruturación.
V Televisión comezou a emitir en maio de 2010, tras obter a súa licenza en 2005 do goberno de Manuel Fraga en funcións. Chegou a ter máis de medio cento de traballadores e depende de Medios Audiovisuales de Galicia SL que explota, entre outras, Voz Audiovisual, Radio Marineda e Radio Voz. De feito, Voz TV está integrada en Medios Digitales de Galicia SA.
Na posta en marcha de V TV foi fundamental o apoio da xa desaparecida Caixa Galicia e de Fadesa. O ex presidente da caixa José Luis Méndez e o empresario Manuel Jove participaron moi activamente na súa posta en marcha a traves de CXG que aportou boa parte do capital de Voz TV.
