Villares confirma que aspira a ser o referente dunha marea plural
A coalición rupturista está a debater este sábado o seu futuro como organización. A posíbel creación dunha portavocía nacional é un dos puntos sobre a mesa, asunto sobre o que hai posturas diverxentes.
- Ferreiro chama a "buscar equilibrio" para que exista un "contrapeso non institucional" na dirección de En Marea
- Antón Sánchez espera "un consenso amplo" na definición "das regras do xogo" para escoller dirección de En Marea
- En Marea decide o seu rumbo este sábado
Por Europa Press / Redacción | SANTIAGO DE COMPOSTELA | 17/12/2016 | Actualizada ás 14:34
O voceiro parlamentario de En Marea, Luís Villares, asegurou que se o regulamento que saia este sábado do plenario que o partido instrumental celebra en Santiago o permite "conformará" unha candidatura para poñer "voz" ao proxecto de unidade popular, a dirección da cal é plural e "exerce toda a dirección".
Así se pronunciou en declaracións aos medios de comunicación, aos que recordou que "non hai ningunha dúbida" sobre o liderado de En Marea, que "exerce toda a organización". Neste sentido, subliñou que no plenario deste sábado, "todo o mundo poderá expresarse con liberdade" sobre o regulamento político e o documento organizativo. "Hoxe todos somos inscritos que imos expresar a vontade de avanzar nun proxecto mellor para este país", indicou.
Con todo, recordou que, xa os documentos de Vigo marcan que a representación das voces de En Marea "sexa plural". "Vai haber unha pluralidade, sempre houbo esa pluralidade, polo tanto, o feito de que existan portavocías non implica que non vaia haber pluralidade en todo momento", apuntou.
Neste punto, volveu sinalar que el ocupará o lugar que a formación "queira", "igual que o foi ata agora". "Ata agora a miña función foi ser unha persoa de consenso que xuntase todas as sensibilidades do conxunto da marea, que buscase a conciliación fronte á tensión", indicou.
