Por Galicia Confidencial | Santiago de Compostela | 30/12/2016 | Actualizada ás 17:00
A Associaçom de Estudos Galegos (AEG) vén de poñer en marcha unha iniciativa divulgadora dos padróns galego, lusitano e brasileiro que, como sinala a propia organización, son parte "da nossa língua comum". A campaña leva por título 'Umha língua extensa e útil!'.
Por iniciativa da Comissom Lingüística da AEG, iníciase a publicación dunha serie de infografías para dar a coñecer as principais diferenzas existentes entre os padróns lingüísticos da Galiza, de Portugal e do Brasil. Partindo do principio da unidade da lingua, a AEG considera "importante que a sociedade galega conheça a proposta reintegracionista e como ela recolhe e respeita as particularidades do galego, como parte de um dos maiores espaços lingüísticos do mundo: o galego-luso-brasileiro-africano de expressom galego-portuguesa".
"Para tal, consideramos necessário esclarecer a inexistência de umha única norma ou padrom internacional de ámbito lusófono. Ao invés, cada naçom tem a sua própria norma, que afeta nom só a ortografia, mas também o vocabulário, a morfossintaxe e a fala. A existência do Acordo Ortográfico da Língua Portuguesa de 1990 nom impugna essa realidade em nengum desses ámbitos", argúen os promotores da iniciativa.
A AEG lembra que "o reintegracionismo galego propujo há mais de 30 anos um padrom nacional que nos incorporasse, em pé de igualdade, ao mundo galego-luso-brasileiro".
A iniciativa que agora se pon en marcha ten como obxectivo principal "socializar as caraterísticas do padrom galego, comparativamente com as particularidades dos outros dous padrons mais bem conhecidos da nossa língua comum: o lusitano e o brasileiro", explican.
Así, os promotores da campaña aspiran a "aumentar o conhecimento social da proposta reintegracionista, que incorpora o galego a um amplo espaço lingüístico policêntrico, junto às variedades faladas naqueles países que, junto à Galiza, formam umha comunidade internacional de mais de 250 milhons de falantes".
Para acadar o obxectivo, a AEG anima a todo o mundo a divulgar e compartir libremente as infografías que irá publicando ao longo das próximas semanas en redes sociais, blogues, correo electrónico, etc. E propón usar en redes a etiqueta #UmhaLínguaExtensaeÚtil que dá nome á campaña, "tomada da histórica sentença do nosso Daniel Castelao".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.