Por GC Tendencias | Pontevedra | 09/01/2017 | Actualizada ás 12:53
A Sede Afundación Pontevedra acolle o vindeiro sábado 14 de xaneiro ás 20.00 h o espectáculo teatral Red Rock Caperucita, un musical no que se versiona o clásico infantil de Charles Perrault. A seguinte función terá lugar na cidade de Vigo, no Teatro Afundación, o domingo 15 de xaneiro ás 19.30 h. As entradas en ambos os dous casos están dispoñibles a través das canles de venda habituais, como por exemplo en ataquilla.com dende só 15 euros.
Red Rock Caperucita achega novos factores ao conto orixinal, engadindo valores morais, ecolóxicos, sociais e tamén novos personaxes que, sen desvirtuar a esencia da historia, a compactan como un espectáculo didáctico e emocionante, que difunde unha mensaxe ao espectador á vez que divirte e sorprende. A posta en escena adáptase aos nosos tempos e tradúcese a unha linguaxe habitual entre as novas xeracións, á vez que transmite e reforza uns valores constantes, nunha localización atemporal.
Nesta adaptación fúndense a posta en escena dos artistas coa participación do equipo técnico. Con iso conséguese que o público tome parte activa na representación, participando en decisións, axudando a resolver imprevistos e transportando o espectador dentro e fóra do conto, cunha serie de interrupcións baixo guión que dotan a obra de comicidade e complicidade, sen que por iso se perda o fío argumental. Red Rock Caperucita, no fondo, lévase a cabo case por casualidade e como consecuencia de certos acontecementos que suceden no teatro antes da súa representación. Hai escenarios como bosques encantados, e novos personaxes como Pedro o Valente. O lobo non é un animal, pero non por iso deixa de ser lobo. A avoíña é moito máis que un personaxe da historia... A fantasía rodea a posta en escena ata extremos tecnicamente complexos. Luces, proxeccións, son exquisito e efectos especiais que non dan tregua ao espectador e que, en conxunto, dotan de maxia e emoción un argumento fácil de seguir, con cancións vibrantes, coreografías espectaculares e interpretacións que emocionan ou fan rir. Todo iso, da man dunha Carapuchiña que soña con ser unha estrela do rock.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.