Até 1.000€ por ensinar ou opinar nun vídeo en galego
Ourense acolleu esta mañá a presentación dunha iniciativa para normalizar o galego na rede, sobre todo entre os máis mozos. O Concurso Youtubeir@s é unha iniciativa dos servizos de normalización lingüística dos concellos da Baña, A Coruña, Ames, Carballo, Mazaricos, Ourense, Pontevedra, Ribadeo, Santiago de Compostela, Teo e O Grove, e tamén das Universidades da Coruña, Santiago de Compostela e Vigo.
Por Galicia Confidencial | Ourense | 20/01/2017 | Actualizada ás 14:22
Youtubeir@s busca incrementar o uso do galego nos contidos audiovisuais dunha das redes sociais máis populares. No Youtube andan máis de 1.000 millóns de usuarios, moitos deles atraídos por vídeos autoproducidos.
Normas para participar
Ao concurso poderán presentarse todas as persoas maiores de 14 anos a través dunha inscrición en liña ata o 28 de abril, segundo se recolle nas bases dispoñibles na súa web.
Os vídeos deben ter unha duración máxima de 5 minutos, estar licenciados en creative commons, producidos en galego e estar dispoñibles na rede social YouTube. Os e as participantes poderán concorrer a dúas categorías: Video-facermos, para videotitoriais que amosen como facer cousas (desde unha receita ata a como instalar un programa informático); e Vídeo-opinarmos, para vídeos nos que se achegue unha opinión ou valoración sobre calquera tema (valoración dun filme, opinión sobre un tema de actualidade...).
Premios
Cada unha destas categorías vai ser premiada cunha contía de mil euros e tamén se asignarán catro mencións honoríficas de cincocentos euros segundo os criterios de valoración que terá en conta o xurado, composto por profesionais da comunicación audiovisual.
Formación
Youtubeir@s tamén ofrece formación específica de videocreación. En Ourense haberá dous cursos, un salón de graos do edificio de Facultades os días 7 de febreiro e outro no Centro de Coñecemento La Molinera os días 10 de febreiro e 17 de febreiro.
En que consiste o curso?
Na primeira sesión formativa, dunha hora de duración, abordaranse os consellos básicos para sacarlle o maior partido á cámara dos nosos dispositivos móbiles e aprenderase a escribir un guión. Na segunda sesión formativa, de dúas horas de duración, editarase o material e verase como subilo a YouTube. Entre ambos os dous encontros formativos haberá asistencia en liña.
A presentación estivo presidida por Belén Iglesias, concelleira de Cultura do Concello de Ourense, e José María Faílde, director de Planificación do Campus de Ourense, acompañados dos técnicos de normalización lingüística de ambas entidades, Mónica Fernández Valencia e Paulo Cabral.
