María Rey explica que Ciudadanos decidirá en tres meses a súa estrutura en Galicia para crecer "aos poucos"

A edil de Ciudadanos en Pontevedra e nova membro do Consello Xeral da formación laranxa en España, María Rey, explicou que o partido que lidera Albert Rivera decidirá en tres meses a súa estrutura en Galicia para "crecer aos poucos".

María Rey pronunciouse deste xeito nunha entrevista concedida á Radio Galega, difundida pola propia emisora, na que recoñeceu que Ciudadanos ten que ir en Galicia "aos poucos" e explicar como pode mellorar o país cunha estrutura "forte".

A nova integrante do Consello Xeral de Ciudadanos recoñeceu que a súa formación non estaba "preparada" nas pasadas eleccións. "Somos demasiado novos e temos que crecer aos poucos con sentidiño", manifestou.

Nesta liña, considerou que deben comezar polas cidades e pobos e ir crecendo ata chegar ao Parlamento autonómico e despois ao Congreso.

Na súa intervención, María Rey non quixo adiantar quen poderá ser o líder do seu partido en Galicia pero asegurou non postularse para esa elección.