Por Galicia Confidencial | Ourense | 27/04/2017 | Actualizada ás 09:00
A traxectoria de Ulloa foi discutida no último pleno do municipio cando se debatía sobre a situación do corpo municipal. Algo que, a vista do contido da misiva, non lle sentou nada ben a quen fóra máximo responsábel da Policía Local de Ourense.
Ourense en Común critica que “a carta fose entregada en man por un policía de servizo, e denuncia que no contido da mesma se fan comentarios que poden encadrarse nunha coacción a un cargo público, co fin de intimidar”.
Na epístola, o axente dille á representante cidadá que el foi o máximo responsábel do corpo armado dende hai 30 anos, “posiblemente antes de que vostede nacera”. O funcionario, que pide acuse de recibo da misva, presume tamén das súas diferentes cualificacións e experiencia como axente da orde.
Outro dos puntos dos que deixa constancia é que el xa non é o máximo mandatario da Policía Local, dende 2012, cando saltou a súa imputación. Unha decisión que cualifica de “ilegal” malia que admite que non a recorreu.
En 2012, o daquela xefe da Policía Local de Ourense, Álvaro Abelardo Ramón Ulloa Pardo, foi cesado do seu cargo, de libre designación, tras ser detido e imputado no marco da 'Operación Pokemon', que investiga unha suposta trama de corrupción e subornos en adxudicacións públicas. Porén, Ulloa, estivo en liberdade baixo fianza tras pagar 5.000 euros, mantén a praza de superintendente, obtida por oposición. Na súa declaración ante a xuíza Pilar de Lara, en 2014, segundo informara La Región negou calquera trato de favor e ter recibido pagos periódicos de Vendex.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.