Piden á UE que investigue a xestión dos fondos europeos de proxectos en Ourense
Izquierda Unida quere que se investigue o diñeiro que foi a parar a proxectos que dirixía o líder popular Rogelio Martínez González.
Por Galicia Confidencial | | 04/05/2017 | Actualizada ás 10:00
As irregularidades en varios proxectos europeos en Ourense van chegar á UE. A eurodeputada de IU, Marina Albiol, preguntará á Comisión Europea (CE) se vai levar a cabo medidas para investigar a presunta malversación de diñeiro público investido en proxectos financiados con fondos Leader en Ourense. Tamén vai demandar que a UE contacte co Goberno español para esixir explicacións sobre estas irregularidades vinculadas á construción dunha planta de biomasa e cinco obradoiros de artesanía en Arnoia, proxectos que estaban baixo a planificación e xestión de Rogelio Martínez González, home de confianza de Alberto Núñez Feijóo e o entón alcalde desta localidade.
Foi no mes de abril cando o xulgado de Primeira Instancia e Instrución de Ribadavia (Ourense) ordenou a apertura de xuízo oral contra Rogelio Martínez González, así como dunha decena de técnicos e particulares vinculados ao Partido Popular que presuntamente executaron unha trama corrupta para obter diñeiro público de fondos europeos. Martínez González era, daquela, o presidente do Grupo de Acción Local CEIVAM, encargado da xestión dos fondos Leader na comarca.
Ante a posibilidade de estar “diante dun patrón xeneralizado” de modelo de conduta, Marina Albiol preguntará á Comisión se “ten constancia das irregularidades cometidas no proceso de concesión de fondos e execución dos proxectos aos que lles asignaron os fondos Leader”. Ademais, a eurodeputada de IU incidirá en “que mecanismos ten a Comisión Europea para o control e seguimento sobre a concesión, execución e posterior funcionamento de infraestruturas construídas con fondos europeos e se foron activados para o caso citado”.
“Dende Esquerda Unida consideramos que a Comisión Europea debería ter formas de control eficientes para asegurar que o diñeiro público da cidadanía non vai parar a petos privados, unha práctica corrupta que parece responder ao modus operandi do PP, partido envolto en casos de corrupcións”, indica esta formación nun comunicado.
