Por M.V. | SANTIAGO DE COMPOSTELA | 11/06/2017 | Actualizada ás 11:11
Máis de 500 persoas déronse cita este sábado na capital galega para protestar contra o desaloxo dun local okupa, o Eskarnio e Maldizer, situado no centro histórico a finais do pasado mes de maio. Ao principio non houbo incidentes, pero logo manifestantes entraron na antiga sede do Colexio Peleteiro e a tensión aumentou.
Dado que, como informou en días pasados o delegado do Goberno en Galicia, Santiago Villanueva, a marcha non foi notificada, os axentes despregados na zona impediron aos concentrados acceder á zona vella de Santiago. De acordo a Lei, as manifestacións non teñen porque ser autorizadas, pero si comunicadas ao Goberno Civil, que só pode limitalas no caso de que aprecie risco claro para os bens ou as persoas.
Ademais da advertencia verbal, liñas de antidisturbios totalmente equipados impediron o paso aos manifestantes cara as entradas do casco histórico desde Porta Faxeira ou Porta da Mámoa. Así mesmo, varios axentes revisaron as mochilas dalgúns dos convocados.
Polo demáis, hai numerosas referencias nas redes sociais a rexistros nas estacións de autobuses e de tren por parte de axentes de paisano. Tamén houbo vixilancias e rexistros diante do CSO de Sar, en ocasións por parte de axentes non uniformados.
A marcha partiu da Alameda compostelá pasadas as 21,00 horas e seguiu pola Rúa da Senra sen maiores incidentes. Un helicóptero sobrevoaba a cidade dende horas antes da convocatoria.
INTENTO DE OKUPACIÓN DO PELETEIRO
Os manifestantes marcharon pacíficamente pola zona nova da capital. Ao chegar a porta do Colexio Peleteiro, a cabaceira de manifestación colgou a pancarta de cabeza sobre as portas principais. Ducias de manifestantes entraron no gran inmóbel -abandonado hai anos- berrando o clásico "un desaloxo, outra okupación!".
Dáse a circunstancia que no Peleteiro estivo durante anosa sede da Comisaría da Policía Nacional na cidade , aínda que provisionalmente. Parece que a intención dos activistas era realizar unha asemblea na antiga sede deste colexio privado. Non estaba claro se ían tentar unha nova okupación -aínda que parece o máis probábel.
Os axentes antidisturbios vixiaron a marcha dende a parte traseira. Despois duns minutos de tensión e de berros, achegáronse a porta. Houbo berros dos manifestantes, moitos dos cales sentaron no chan coas mans levantadas.
CARGAS E DETIDOS
Os antidisturbios realizaron a primeira carga a iso das 22:36. Segundo algunhas testemuñas, os axentes cortaron a rúa, empurraron aos manifestantes e mesmo dispararon pelotas de goma. Houbo varios feridos debido as porradas.
A continuación os antidisturbios dirixíronse ao interior do Colexio. Compañeiros subidos nunha furgoneta disparaban sobre o muro botes de fume e pelotas de goma ao interior. Aló esperaban uns 20 activistas, encapuchados.
Outros manifestantes trataron de impedir a súa entrada mediante unha sentada. A Policía foi botándoos de xeito violento. Os funcionarios foron arrastrando aos pro-okupa até chegar a porta e conseguir entrar. Varias furgonetas achegáronse ao inmóbel e nelas os axentes meteron a varias persoas.
O Goberno Civil informou posteriormente que houbera dous detidos. A Administración tamén dixo non ter constancia de feridos.
Unhas vinte personas foron levadas á Comisaría, onde foron identificadas, suponds que eran os cidadáns que entraran no Peleteiro. Un cento de persoas desprazáronse á porta da Comisaría para agardar por eles. A noite transcorreu sen máis incidentes, máis alá da gran presencia de antidisturbios e o helicóptero iluminando a noite santiaguesas, circunstancia no infrecuente en Compostela todos os veráns.
LECTURA POLÍTICA
O PPdeG leva días intentando facer desta polémica o centro do debate político na cidade. Por exemplo, logrou que o seu líder local, Agustín Hernández, saira na prensa nunha reunión co seu compañeiro de partido, o delegado do Goberno en Galicia, para planificar o gran dispositivo policial de onte. De paso, os conservadores acusan ao alcalde Martiño Noriega de estar de lado dos okupas e contra a Policía.
Malia que onte non houbo agresións aos axentes e si unha dura resposta policial, o frustrado intento de desaloxo daralle munición a esta estratexia, amplificada pola prensa local oposta na súa totalidade ao Goberno de Compostela Aberta.
Tanto a marea como o BNG defenderon a manifestación. Despois desta, os estudantes nacionalistas de Erguer Galiza e os mozos do Bloque Galiza Nova sacaron comunicados denunciando a virulenta actuación policial. Non houbo políticos de primeira fila na marcha. Si estivo o escritor Manuel Rivas.
TERCEIRA PROTESTA
Coa deste sábado, trátase da terceira protesta convocada polo colectivo okupa desde que o día 30 de maio a Policía desaloxase e tapiase un centro social autoxestionado por orde xudicial. O CSO Escarnio e Maldizer programa actividades culturais nun edificio propiedade da contrutora local La Rosaleda.
Nesa mesma xornada do desaloxo, celebrouse unha mobilización que concluíu cunha detención e varias cargas policiais que incluíron gases lacrimóxenos e disparos de pelotas de goma. Seguiulle outra marcha ao día seguinte que finalizou sen incidentes.
Velaquí unha escolma do publicado nas redes sociais polos manifestantes:
@policia os parece normal esto?
— A Varela (@A_Varela_) 11 xuño 2017
RT @iriamendezgz: Non queren que se conte #EscarnioeMaldizer pic.twitter.com/cwzHnKFWYh
A manifa responde con resistencia pacífica #EscarnioeMaldizer #EscarnioSomosTodas pic.twitter.com/hChusLxSpO
— Gaymonio ☭ (@Bechologo) 10 xuño 2017
Polícia vai carregar apesar de nom mediar qlquer provocações #escarnioemaldizer Divulguemos! pic.twitter.com/XZmrrZC3QA
— Diário Liberdade (@diarioliberdade) 10 xuño 2017
A prova da atitude pacífica das manifestantes #escarnioemaldizer pic.twitter.com/efEIVNwOXs
— Diário Liberdade (@diarioliberdade) 10 xuño 2017
Comezan as cargas policias no ensanche compostelan #EscarnioeMaldizer pic.twitter.com/C156dduMlR
— Óscar Corral (@corralfoto) 10 xuño 2017
Compostela: Policías golpean a los activistas que resisten contra los desalojos. #EscarnioSomosTodas @diarioliberdade pic.twitter.com/ld5AjYQikw
— Revolución Real Ya (@RRYrevolucion) 10 xuño 2017
Estas son as nosas armas, berraban #EscarnioSomosTodas #EscarnioeMaldizer pic.twitter.com/6bM03kpXGL
— Iria Méndez (@iriamendezgz) Estas son as nosas armas, berraban #EscarnioSomosTodas #EscarnioeMaldizer pic.twitter.com/6bM03kpXGL— Iria Méndez (@iriamendezgz) 10 xuño 2017
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.